Por Galicia Confidencial | Santiago de Compostela | 05/11/2020 | Actualizada ás 22:30
A Asociación para a Defensa Ecolóxica de Galiza (ADEGA) denuncia que Augas de Galicia aprobou a inciativa de Explotaciones Gallegas S.L., para o transvasamento de tres regatos contaminados por residuos da mina de Touro.
En concreto son os regatos Portapego, Felisa e Angumil que están drenando residuos procedentes da antiga explotación mineira e que van parar ao río Ulla. A idea de Explotaciones Gallegas S.L., é a de desviar estes regatos á balsa de Vieiro, informa ADEGA. Esta balsa só tería capacidade para sete meses de almacenamento das augas destes tres regatos.
Desde a asociación ecoloxista denuncian que a empresa non propuxo ningunha solución posterior ao almacenamento das augas contaminadas. Non se sabe “se rematarán os bombeos e volvendo á situación actual ou se enviarán estas augas a outra balsa”. Engaden tamén que a balsa de Vieiro actualmente sofre numerosas filtracións que acaban en verteduras ao río Brandelos, contaminando un maior número de acuíferos.
Logo da autorización de Augas de Galicia, a empresa deberá presentar un proxecto definitivo pasados tres meses da drenaxe temporal. As obras teñen un ano de prazo máis os sete meses de operación de transvasamento.
Por outra parte, ADEGA sinala que estas obras, a case un ano da Declaración de Impacto Ambiental negativa por parte da Xunta para reabrir a mina, poden ter detrás a intencionalidade de elaborar un novo proxecto de explotación mineira.
Sobre isto último, a asociación ecoloxista sianala a súa preocupación ante a “manifesta intención da Xunta de facilitar ao máximo a tramitación destes proxectos”. Como exemplo poñen a eliminación de atrancos administrativos e a axilización de trámites tal e “como anunciou Alberto Núñez Feijóo”. Lembran así a “Lei de Depredación” coa que intentou reabrir a mina de Touro, mais agora a diferenza está en que “xa estarían sometidos os novos proxectos que presente a mineira”.
A axilización anunciada pola Xunta faría que as “consideracións de Augas de Galicia ou de calquera ouutro departamento xa non serían determinantes, e o proxecto mesmo podería ir adiante con informes negativos, e tramitarse na metade de tempo”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.