Greenalia emite bonos verde para financiar proxectos eólicos en Galicia

Greenalia completou "con éxito" unha emisión de bonos senior no Mercado Alternativo de Renda Fixa (MARF) por importe de 55 millóns de euros, segundo informou a compañía, que explicou que, inicialmente, a emisión estaba prevista para 50 millóns de euros pero, a última hora, e debido á "cantidade e calidade" da demanda, ampliouse ata os 55 millóns. Parte deste diñeiro servirá para financiar os proxectos previstos en Galicia, algúns deles en áreas protexidas.

O importe nominal unitario de cada bono, destinado a investidores cualificados, foi de 100.000 euros, cun prazo de vencemento de 5 anos e un cupón do 4,95% anual pagadeiro semestralmente. Esta empresa fichou hai uns meses a ex conselleira de Emprego con Feijóo, Beatriz Mato.

Cos recursos captados, Greenalia financiará o seu "ambicioso" plan de crecemento, desenvolvendo unha parte "moi relevante" dos proxectos de xeración de enerxía renovable que ten na súa carteira, o que a converterá en "un dos actores máis relevantes do sector en España", segundo a compañía.

Actualmente, Greenalia conta con 24 MW eólicos e 50 MW de biomasa en desenvolvemento, 22,5 MW en fase de proba, 28 MW en construción (con expectativas de posta en funcionamento para o segundo trimestre de 2021) e 135 MW en tramitación.

Parque eólico de Greenalia en Miñón (A Coruña). GREENALIA