O PSdeG: "O AVE a Galicia estará finalizado en 2021 a pesar dos atrasos de Feijóo e Rajoy"
"O que tería que facer Feijóo é explicar por que calou mentres Rajoy e Pastor paralizaban o AVE", di Gonzalo Caballero.
Por Europa Press / Redacción | SANTIAGO DE COMPOSTELA | 18/12/2020 | Actualizada ás 19:01
O secretario xeral do PSdeG, Gonzalo Caballero, subliñou que o AVE a Galicia estará finalizado en 2021 a pesar dos "atrasos" casuados polo presidente da Xunta, Alberto Núñez Feijóo, e o que fose titular do Goberno do Estado, Mariano Rajoy.
Gonzalo Caballero mantivo este venres unha reunión coa presidenta de Adif, Isabel Pardo de Vera, para coñecer o ritmo de execución das obras do AVE a Galicia. Tras o encontro, nun comunicado remitido aos medios, Gonzalo Caballero referiuse ao informe do Tribunal de Contas que detectou unha "paralización" na construción da liña de alta velocidade ferroviaria a Galicia durante a etapa de Rajoy como presidente e Ana Pastor como ministra de Fomento. "E con Feijóo en silencio cómplice" desde a Xunta.
Por iso, censurou que Feijóo tente agora "confrontar co goberno de España" pondo en cuestión o avance das obras, tras a "complicidade" que mostrou cando preferiu "estar calado durante eses anos nefastos" do PP á fronte do executivo.
En concreto, o pasado mércores, Núñez Feijóo asegurou que a pesar dos compromisos adquiridos polo Goberno central, Galicia "non vai ter AVE en 2021". "O que tería que facer Feijóo é explicar por que calou mentres Rajoy e Pastor decidían paralizar o AVE a Galicia", sentenciou Gonzalo Caballero, que reclamou ao titular da Xunta "un pouco de coherencia" nas súas críticas ao goberno de Sánchez a poucos meses de que conclúan as obras.
