O BNG volverá reclamar no Congreso o acceso ferroviario ao Porto Exterior da Coruña
Jorquera apoia investir fondos europeos Next Generation nesta infraestrutura tras unha reunión co presidente do Porto.
Por E.P. | A Coruña | 09/02/2021 | Actualizada ás 14:52
O portavoz do grupo municipal do BNG na Coruña, Francisco Jorquera, anunciou que a súa formación volverá presentar no Congreso dos Deputados unha iniciativa en defensa do tren ao Porto Exterior da Coruña e manifestou o seu apoio a que se invistan os fondos europeos Next Generation nesta infraestrutura.
"Temos plena disposición a facer fronte común para asegurar que o acceso ferroviario se acometa canto antes", destacou Jorquera tras unha reunión co presidente da Autoridade Portuaria, Martín Fernández Prado, engadindo que "non hai porto competitivo no mundo" que non conte con este medio de transporte.
Segundo relatou, o deputado Néstor Rego confirmoulle que "volverá levar o tema" ao Congreso e lembrou que a declaración de impacto ambiental da obra "caduca" en xuño, polo que os fondos europeos supoñen, engadiu, "unha oportunidade".
Pola súa banda, Fernández Prado considera o tren á dársena de Punta Langosteira como un dos "grandes retos" do Porto, xunto coa débeda e tentar que sexa "o máis competitivo posible" e valora como "extremadamente importante" o apoio do BNG. Jorquera afirmou que é "imprescindible superar dinámicas do pasado de incomunicación e mesmo enfrontamento" entre Concello e Porto.
