Seguen baixando os casos covid nas residencias que xa teñen menos de 200 contaxios
Os traballadores contaxiados descenden a 90 e nos centros de discapacidade hai 26 usuarios con coronavirus e 15 casos entre persoal.
Por Europa Press / Redacción | SANTIAGO DE COMPOSTELA | 15/02/2021 | Actualizada ás 13:39
Os usuarios de residencias de maiores de Galicia con Covid-19 seguen a tendencia descendente e redúcense ata os 186, o que supón sete menos que a xornada anterior, tras 11 altas e catro positivos.
Segundo os datos actualizados este luns polas consellerías de Sanidade e Política Social, detectáronse tres positivos; un na residencia Milagrosa da Coruña; un no Casón de Moeche; outro na residencia de maiores de Larouco e outro no fogar residencial Xardín Castro Lareira de Salceda de Caselas.
Por contra, saen da lista por negativizar tres usuarios da residencia DomusVi Carballo; dous da Milagrosa da Coruña; outros dous do Casón de Moeche; un de Ribeira; un do San Marcos de Santiago; outro de Nosa Señora do Carmen de Sarria e outro do fogar residencial Xardín Castro Lareira de Salceda de Caselas.
Deste xeito, entre os centros con máis residentes con Covid-19 inclúense a DomusVi Laraxe, con 53; A miña Casa Ferrol, con 28; DomusVi Carballo, con 15; Residencia Milagrosa da Coruña e Virxe da Clamadoira, con nove cada unha; Nosa Señora do Carme, con oito; e Vivenda Comunitaria Sampedro II da Merca e Xardín Castro Lareira de Salceda, con seis en cada caso. A estes súmanse outros 25 con menos de media ducia cada un.
TRABALLADORES E CENTROS DE DISCAPACIDADE
Pola súa banda, os traballadores de residencias de maiores con coronavirus caen a 90 --un menos que a xornada anterior-- tras un alta por negativizar no fogar residencial Xardín Castro Lareira de Salceda de Caselas.
No que respecta aos centros de atención á discapacidade de Galicia, baixaron a 26 os usuarios con coronavirus tras catro altas por negativizar na residencia Pai Menni de Betanzos, que se sitúa con 12 contagios.
