As oposicións para educadores, auxiliares de enfermaría e corpo administrativo da Xunta celebraranse en marzo
Un total de 7.551 opositores examinaranse o día 27 e 28 para acceder a 476 prazas convocadas.
Por E.P. | SANTIAGO DE COMPOSTELA | 24/02/2021 | Actualizada ás 12:14
As oposicións para acceder a prazas de educadores, auxiliares de enfermaría e categorías administrativas da Xunta celebraranse os próximos días 27 e 28 de marzo tras permitir as autoridades sanitarias a súa realización de acordo cos protocolos de seguridade.
Segundo detallou a Consellería de Facenda e Administración Pública, un total de 7.551 opositores examinaranse para acceder a 476 prazas de educadores, auxiliares de enfermaría e categorías administrativas no recinto da Feira internacional de Silleda, o Pazo de Feiras e Congresos de Lugo e o recinto da Fundación Feiras e Exposicións de Ourense. Ademais, as probas de acceso ao grupo C2 de auxiliares de enfermaría celebraranse en dúas quendas sucesivas.
En concreto, o exame para optar a 85 prazas do grupo A2 do corpo de xestión e ao que están convocados máis de 2.000 aspirantes terá lugar o día 27 de marzo pola mañá de modo simultáneo en Silleda, Lugo e Ourense. Pola tarde, realizaranse as probas de acceso a 86 prazas do grupo A2 de educadores nas que participarán 1.965 persoas no tres sedes.
Así mesmo, o día 28 de marzo levaranse a cabo os exames de acceso a 305 prazas de auxiliares de enfermaría, aos que se presentarán 4.584 persoas, nas tres sedes e en dúas quendas sucesivas de mañá e de tarde.
As probas realizaranse de acordo co protocolo elaborado pola Xunta que avalaron as autoridades sanitarias. Deste xeito, os exames terán lugar de modo simultáneo no recinto feiral de Silleda, con capacidade para 13.600 persoas, e o Pazo de Feiras e Exposicións de Lugo e o recinto da Fundación Feiras e Exposicións de Ourense, dos que cada un pode albergar a 1.800 persoas.
Ademais, só se permitirá o acceso aos edificios ao persoal implicado no desenvolvemento das probas e os aspirantes, que deberán presentarse á hora indicada na convocatoria e respectar as medidas de seguridade.
Os accesos correspondentes sinalizaranse en cada unha das probas e os pavillóns ventilaranse, ademais de manterse as probas abertas durante a realización dos exercicios se as correntes de aire ou o ruído non provocan unha situación de incomodidade.
