Consumópolis e Galicons-Net, concursos para fomentar o consumo responsable entre os escolares
Entre a temática; consumo e xénero, linguaxe publicitaria, comercio electrónico, servizos financeiros ou etiquetaxe de bens e produtos.
Por E.P. | SANTIAGO DE COMPOSTELA | 26/04/2021 | Actualizada ás 11:07
A Consellería de Economía, a través do Instituto Galego do Consumo e da Competencia, e a Consellería de Cultura, Educación e Universidade, publicaron as bases para participar nos concursos Consumópolis e Galicons-Net, cos que se busca fomentar o consumo responsable a través da innovación nos centros educativos de Galicia.
Por unha banda, Consumópolis é un concurso escolar sobre consumo responsable que este ano chega á súa 16ª edición: 'Consumópolis-16, Coida o teu planeta cun consumo + responsable, atréveste?'.
O concurso consiste nun percorrido pola cidade virtual de Consumópolis e os equipos estarán formados por cinco alumnos ou alumnas, sen que poida haber máis de tres membros do mesmo sexo. Nesta iniciativa establécense tres categorías: a primeira para o alumnado de 5º e 6º de Educación primaria; a segunda para estudantes de 1º e 2º de Educación Secundaria Obrigatoria; e a terceira dirixida ao 3º e 4º curso de Educación Secundaria Obrigatoria ou de Formación Profesional Básica.
Concederanse tres premios, de 1.000, 600 e 300 euros, para os traballos clasificados respectivamente en primeiro, segundo e terceiro lugar por cada unha das categorías. Ademais, os traballos clasificados en primeiro lugar en cada unha das categorías de participación representarán a Galicia na fase estatal. Os centros terán ata o día 2 de xuño para realizar os traballos e presentar a súa solicitude de participación.
GALICONS-NET
Pola súa banda, os participantes en Galicons-net teñen que realizar un proxecto de innovación educativa sobre algunha das seguintes temáticas de consumo responsable: consumo e xénero, linguaxe publicitaria, comercio electrónico, servizos financeiros ou etiquetaxe de bens e produtos.
Na convocatoria dos premios para este ano establécense catro categorías de participación: para o alumnado de segundo ciclo de Educación Infantil e de Educación primaria; estudantes de Educación Secundaria Obrigatoria; Bacharelato, ciclos formativos de grao medio e de grao superior e Formación Profesional e educación de persoas adultas; e, a cuarta categoría, alumnado de educación especial.
