'A Tribuna', a revista da Casa-Museo Emilia Pardo Bazán, será dirixida por Marilar Aleixandre
Por E.P. | A CORUÑA | 03/05/2021 | Actualizada ás 17:27
A Real Academia Galega (RAG) nomeou á académica de número Marilar Aleixandre como nova directora de 'A Tribuna', a revista da Casa-Museo Emilia Pardo Bazán. Diso informou a Academia nun comunicado remitido aos medios, no que explica que a escritora e catedrática ad honorem da Universidade de Santiago de Compostela (USC) substituirá no cargo ao académico Xosé Ramón Barreiro Fernández, falecido o pasado mes de marzo.
Xunto a Marilar Aleixandre, o académico José Manuel González Herrán, un dos máis destacados especialistas na obra de Emilia Pardo Bazán e catedrático emérito da USC, será o director adxunto da publicación; e a académica Olivia Rodríguez, profesora da Universidade da Coruña, asumirá a secretaría.
A revista, que se publica desde o ano 2003, congrega aos maiores especialistas na figura e na obra de Emilia Pardo Bazán de todo o mundo. Ademais, a nova dirección da revista coincide no tempo co centenario da morte da escritora.
A Real Academia Galega celebrará ese mesmo día, o próximo 12 de maio, un acto conmemorativo na Rúa Tabernas, sede da institución e da Casa-Museo de Pardo Bazán, onde se conserva boa parte do seu arquivo e biblioteca persoal.
A programación da RAG con motivo do centenario da intelectual inclúe, entre outras actividades, un congreso internacional que terá lugar a finais de outubro, coincidindo coa chegada á Coruña da exposición Emilia Pardo Bazán. Antes, este xoves, día 6 de maio, Susana Seivane protagonizará un novo encontro do ciclo de conversacións de mulleres destacadas de distintos ámbitos na Casa-Museo.
