Por Europa Press / Redacción | A CORUÑA | 20/05/2021 | Actualizada ás 13:12
O Xulgado de Primeira Instancia número 1 da Coruña suspendeu as actuacións relativas ao Pazo de Meirás ata resolver se o mobiliario forma parte do inmoble e das leiras incluídas no recinto que a familia Franco debe devolver ao Estado, tal e como decretou o xulgado de primeira instancia nunha sentenza confirmada pola Audiencia Provincial da Coruña e contra a que cabe presentar recurso.
Nesa resolución na que se declarou que o pazo é propiedade do Estado "non se condena aos demandados a entregar os mobles existentes nas distintas dependencias ao Estado", polo que, tal e como determinou a Audiencia Provincial, corresponde ás administracións públicas "promover o correspondente incidente de execución para discutir e resolver sobre cal é a extensión da sentenza que se executa".
Por iso, a Administración Xeral do Estado presentou un incidente de execución no que demanda a "necesaria conservación do inventario" aprobado no seu día polo xulgado, así como unha segunda cuestión incidental na que solicita a "delimitación dos bens integrantes e pertenzas" do pazo tendo en conta o artigo 334 do Código Civil, no que se definen os bens inmobles. Pola súa banda, o Concello de Sada reclama que se inclúa, a efectos de execución de sentenza, o mobiliario como parte do Pazo de Meirás.
O Xulgado de Primeira Instancia número 1 da Coruña tramitará o tres cuestións incidentais de forma conxunta e resolveraas ao mesmo tempo. Contra a providencia ditada hoxe cabe presentar recurso de reposición no prazo de cinco días.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.