CxG dispara contra Besteiro

Leva un mes como líder do PSdeG e Xosé Ramón Besteiro xa está sendo criticado e xa non só polo PPdeG, senón tamén por Compromiso por Galicia (CxG), formación coa que, por outra banda, non mantivo ningún tipo de encontro oficial desde a súa chegada á dirección do Partido Socialista en Galicia.

Xoán Báscuas nas primarias de Compromiso por Galicia

Así, o secretario Xeral de CxG, Xoán Bascuas, vén de cualificar a Besteiro como “unha expectativa truncada”. Estas declaracións realizáronse despois dun encontro con militantes e simpatizantes en Pontevedra, e onde, preguntado polas primeiras semanas de xestión de José Ramón Gómez Besteiro, o líder galeguista cualificounas como “máis do mesmo”.

Bascuas entende que no PSdeG-PSOE “todo segue igual, ou peor”, xa que as primeiras accións levadas a cabo polo seu Secretario Xeral “responden ás vellas formas de facer política, e non distan tanto das do PP como nos queren facer ver”. Neste sentido, criticou o nomeamento de Méndez Romeu como Portavoz parlamentario “transmitindo á cidadanía unha mensaxe moi negativa, coas vellas caras da política de sempre en Galicia”. Tamén polas “bochornosas” declaracións abrindo a porta á privatización dos hospitais públicos, “ou como lle gusta dicir a el, a externalización da xestión e de certos servizos”. 

"Despacho no Hórreo"

"Logo colocouse un despacho no Hórreo, non sabemos se porque non se fía do seu grupo parlamentario ou porque non lle chega co que ten no Pino, á vez que quere blindarlle un retiro dourado a Pachi Vázquez colocándoo na Mesa do Parlamento, con chófer incluído”, engadiu o líder de CxG. 

Ademais, Bascuas criticou a intención de Feijóo e Besteiro de recortar o Parlamento de Galicia, "reducindo a súa pluralidade e apostando pola consolidación do bipartidismo moi en consonancia cos valores do socialismo”. Finalmente, criticou a Besteiro por "facerlle seguidismo ao PP" por apoiar o canon de Sogama na FEGAMP.