Dimiten os 4 concelleiros socialistas de Oia por "discrepancias" coa nova executiva local: "Sentímonos pouco valorados"

Os catro concelleiros socialistas da localidade pontevedresa de Oia presentaron a súa renuncia á acta de edís polas súas "discrepancias" coa nova executiva local do partido, que foi elixida o pasado maio con José Miguel Sánchez Alcalde como secretario xeral do PSOE no municipio. Tal como explicaron, os catro concelleiros (Gerardo Rodríguez, Candido Castro, Américo de Oliveira e Belén Puído) renunciarán ás súas actas no próximo pleno, que se celebrará previsiblemente o xoves da semana que vén.

Esta renuncia débese a "discrepancias políticas" coa nova executiva local, que "dificultan o desenvolvemento" dos seus cargos "coa eficiencia que se merece", segundo denuncian en declaracións a Europa Press. "Neste contexto, vémonos na obrigación de dar un paso para un lado e deixar que a nova executiva local leve a cabo o seu novo proxecto, xa que sentímonos pouco valorados e sen recoñecemento do noso labor", engadiron, esperando que o novo grupo municipal actúe "libremente" e "acorde coa nova forma de facer política e oposición".

"Cremos que aínda queda tempo suficiente para que o PSOE de Oia consiga o que todos desexamos: poder chegar a gobernar para mellorar o noso concello e a vida dos veciños", sentenciaron. Cómpre lembrar que o Concello de Oia está gobernado por maioría absoluta polo PP, con seis concelleiros, mentres que o PSOE ten 4 edís e o BNG, 1. Esta renuncia prodúcese precisamente días despois de que a executiva do PSOE de Salceda de Caselas e os seus dous concelleiros dimitisen en bloque por desavinzas coa agrupación provincial do partido.

Imaxe dos concelleiros do PSOE de Oia | Fonte: CEDIDA