Por Europa Press / Redacción | SANTIAGO DE COMPOSTELA | 27/06/2021 | Actualizada ás 12:41
Catro familiares --formados por dous matrimonios-- e un asesor fiscal enfróntanse a penas que van do cinco aos 36 anos de cárcere por evasión de impostos do IVE e de sociedades durante os exercicios de 2009 e 2010 en tres empresas de confección téxtil, radicadas no municipio de Ordes (A Coruña).
A Sección Primeira da Audiencia Provincial da Coruña xulga este mércores, 30 de xuño, este caso de defraudación tributaria, no que a máxima pena que pide fiscalía é para o asesor fiscal (36 anos de prisión) como "cooperador necesario" de nove delitos fiscais, "participando ao deseñar", xunto con cada administración societaria, "o mecanismo empregado para a comisión da evasión".
Para as outras catro persoas que serán xulgadas, a fiscalía pide penas que van dos cinco anos e tres meses aos 21 anos e tres meses de prisión. O caso procede do Xulgado de Instrución número 1 de Ordes.
Así, a primeira das empresas non presentou ningunha declaración tributaria durante os exercicios 2009 e 2010 (nin periódica nin o resumo anual), coa consecuencia de que non ingresou na Facenda Pública as cotas correspondentes ao IVE dos exercicios 2009 e 2010 (208.484,8 euros no 2009 e 210.544,6 euros no 2010), así como 128.396 euros correspondentes ao imposto de sociedades do ano 2010. Todo iso, a pesar de que facturou 3 millóns de euros entre ambos os exercicios.
No tocante á segunda empresa, a evasión do IVE en 2009 e 2010 suma máis de 258.000 euros, mentres no imposto de sociedades son uns 315.00 euros entre ambos os exercicios. A cifra de vendas tamén supera os 3 millóns entre os dous anos.
Na terceira empresa, a fraude impositiva pasa por non abonar o IVE de 2009 e 2010, unha cantidade que roza os 300.000 euros. Aquí as cifras de vendas entre ambos os anos están preto dos catro millóns de euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.