Por E.P. | SANTIAGO DE COMPOSTELA | 21/07/2021 | Actualizada ás 13:39
O Diario Oficial de Galicia (DOG) publica este mércores unha orde pola cal se destinan máis de 10 millóns a unha nova edición dos programas integrados de emprego, que acompañarán este ano a case 4.000 desempregados na procura dun posto de traballo e na adquisición dunha mellor formación.
En concreto, esta liña, dotada con 10.080.000 euros a cargo dos fondos finalistas do estado, activa un total de 40 programas dirixidos cada un a 100 parados coa meta de potenciar a súa inclusión laboral. A convocatoria está orientada a entidades locais, soas ou agrupadas, e a organizacións con personalidade xurídica sen ánimo de lucro.
Serán elas as que planifiquen os seus plans, que deben garantir, como mínimo, a inserción laboral do 35% dos participantes nas formacións. O Goberno galego pon o seu foco, como parte prioritaria, nas persoas en risco de exclusión social, vítimas de violencia machista, menores de 30 anos, maiores de 45, persoas con discapacidade ou inmigrantes.
A orde reserva 2 millóns para abastecer a programas dirixidos en exclusiva ás mulleres desempregadas, co obxectivo de que reciban atención específica que lles permita entrar no mercado de traballo.
AXUDAS PARA AFECCIONADOS
Na mesma xornada deuse a coñecer que a Consellería de Cultura, Educación e Universidade convoca unha nova liña de axudas, dotada con 50.000 euros, para a realización de festivais, feiras, mostras, ciclos e certames de artes escénicas e musicais de carácter afeccionado.
O Diario Oficial de Galicia (DOG) recolle este mércores a nova subvención da que se poderán beneficiar institucións sen fins de lucro, entidades locais galegas e agrupacións de concellos, tal e como informou Cultura nun comunicado.
Apoiaranse propostas que teñan unha duración mínima de dous días consecutivos e un máximo de seis, e que como mínimo destinen un 30% do total das actuacións artísticas a cargo de grupos e ou compañías galegas. Ademais, as actividades deberán ser gratuítas para o público, entre outros requisitos.
As axudas convócanse en réxime de concorrencia competitiva e a axuda máxima por beneficiario será de 6.000 euros --que poderá ascender os 7.500 euros cando se trate de solicitudes conxuntas de entidades locais--.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.