Proxectan unha rede social para conectar a comunidade neofalante

O fenómeno neofalante, xa tratado por Galicia Confidencial, segue xerando interese público. Á atención colleitada da man da sociedade --retratada, sobre todo, nas redes sociais-- vén de seguir a comunidade investigadora. A USC anuncia que desenvolverá un proxecto para estudar que leva á rapazada castelanfalante a recuperar a lingua galega para o seu uso diario e non só litúrxico, como podería quedar de cumprirse as malas predicións do Consello de Europa.

O estudo deste fenómeno será desenvolto polo grupo de investigación Novos Medios da Facultade de Ciencias da Comunicación en colaboración coa Xunta de Galicia. Segundo apuntan dende a institución compostelá, o traballo pasará por analizar ese proceso de incorporación ao uso do galego por parte das persoas que tiveron o castelán como primeira lingua. 

Neste senso, destacan, a proposta inicial --que podería ser modificada-- inclúe a elaboración dun portal web e o aproveitamento de aplicacións sociais para implicar a colectivos que optaron por incorporar a lingua galega nas súas interaccións cotiás. Así, Novos Medios procederá a deseñar o sitio web para logo traballar nunha ferramenta interactiva que funcionará como rede social da comunidade neofalante para desenvolver lazos entre esas persoas que optaron por dar o salto ao galego. 

DIMENSIÓN EMPRESARIAL

“A web servirá tamén como fío de contacto entre distintos sectores que empregan a lingua galega para facer negocio, polo que se creará unha área empresarial específica destinada a conectar a responsables de empresas ou persoas interesadas en crear negocios e a servir de enlace entre estes, en distintos países, a través da lingua galega”, destacan dende a universidade. O proxecto arrincará este ano e perdurará ata 2023.