Jácome, sobre a querela da Fiscalía contra el: "Unha denuncia máis; preocupación cero"

O rexedor ourensán, Gonzalo Pérez Jácome, compareceu ante os medios de comunicación por primeira vez desde que se coñeceu que a Fiscalía Provincial de Ourense presentou unha querela na súa contra, por presunta malversación de fondos do partido de Democracia Ourensana. Neste sentido, restoulle relevancia ao acontecido, afirma que xa o "mataron dez veces" pero segue "vivo" e sinala a unha exedil do PSOE como autora da denuncia.

Os feitos que investiga Fiscalía remóntanse entre o 2015 e o 2018, anos nos que Pérez Jácome era edil da oposición. En concreto o Ministerio Público estuda a retirada de dous cheques por parte do líder de DO por unha contía de 50.000 euros entre ambos. Ademais tamén investiga os pagos do grupo municipal á licenza do espazo de televisión de Auria TV. Sobre todo iso, o alcalde apuntou que "é unha denuncia máis" e que ten "preocupación cero", porque "é máis do mesmo". "Hai xente que me dá por morto. Pero matáronme dez veces e sigo vivo", proclamou.

Así pois incidiu en que a querela presentada pola Fiscalía ten unha motivación partidista, recalcando, do mesmo xeito que fixera a través das súas redes sociais, que "se un partido te puxo aí non vas ir en contra del mesmo, día si e día tamén". Neste sentido, chamou a atención acerca de que a fiscal "é un cargo de libre designación" do Partido Socialista. Con todo, matizou que "por suposto que hai que cumprir a legalidade e por suposto que moitos fiscais son independentes poña quen os poña".

Iso si, sinalou á formación para acusar directamente á exedil Áurea Soto (PSOE), que foi responsable de Urbanismo, como a causante da denuncia. "Sen telo seguro, creo que esta denuncia non vén dos tránsfugas, eles xa fixeron das súas en setembro de 2020", comezou o alcalde antes de anunciar que, a súa "sospeita" é "a contorna de Áurea Soto ou ben ela mesma" porque xa o denunciou "varias veces, sempre sen éxito, e agora faino de forma anónima".

Coa edil tivo numerosos conflitos xudiciais no pasado, a eles fixo referencia o propio alcalde lembrado que no ano 2015 a exconcelleira denunciou irregularidades no aluguer da licenza de Auria TV, algo que, asegurou, se repite nesta denuncia e lle fixo sospeitar. "Xa tentara noutra denuncia que a Xunta me multase cun millón de euros pola licenza da tele", continuou o rexedor para, a continuación, apostilar que "lle dá igual" quen alertase a Fiscalía porque "cando isto se arquive, será unha derrota máis".

ACUSACIÓNS Ao PSOE

Ademais, segundo expuxo, os partidos políticos poden elixir libremente en que gastar os seus fondos. Por iso, contou que algúns contratan espazos en radios locais ou televisións e que, mesmo dentro do PSOE, unha das concelleiras "chegou a facturar ao seu propio partido 12.000 euros" por servizos xurídicos prestados a través da súa empresa e "ninguén a levou a Fiscalía".

Nesta liña, preguntouse se agora retirar diñeiro é algo ilegal, apuntando que o hai que ver é o motivo das retiradas. "Hai sociedades anónimas, sociedades limitadas e persoas físicas", dixo. "Neste caso son eu, que son autónomo e podo facturar cunha empresa ou co meu DNI", argumentou. Así, resolveu que o gasto na súa televisión é legal. "Fixémolo, facémolo e seguirémolo facendo. Non é só ético, senón que é o ideal", sentenciou.

O alcalde de Ourense, Gonzalo Pérez Jácome / Rosa Veiga - Europa Press. / Europa Press