O salario por hora sobe menos dun euro en sete anos en Galicia, ata os 8,6 euros

O salario medio por hora situouse en 8,6 euros en 2019 en Galicia, co que experimentou un incremento de menos dun euro en sete anos, se se analiza a serie histórica que publica este venres o Instituto Galego de Estatística (IGE). Así, en 2012 o dato era de 7,9 euros a hora, e pasou aos 8 en que se mantivo entre 2013 e 2015, os 8,1 de 2016, en 2017 e 2018 escalou aos 8,4, ata chegar aos 8,6 de 2019.

Por grandes cidades, o maior salario medio por hora anótao A Coruña, con 10,2 euros, seguida de Santiago, con 10,1. Tamén por encima do media pero por baixo dos 10 euros hora, sitúanse Vigo (9,6) e Pontevedra (9). A continuación, o salario medio por hora de Ferrol é o mesmo que a media galega (8,6) e á cola na lista de concellos de máis de 50.000 habitantes quedan Ourense (8,4) e Lugo (8,1). A mediana, mentres, en 2019, foi de 6,9 euros por hora, o que quere dicir que o 50% dos asalariados ten un salario inferior a esa cantidade.

No relativo ás diferenzas por sexo, os salarios medios e os medianos nas sete grandes cidades son superiores en homes que en mulleres. Segundo idade, o IGE observa que a medida que aumenta a idade tamén aumentan os salarios. As persoas de 55 e máis anos son as de maiores salarios e estes son máis elevados na Coruña, Santiago e Vigo.

Por outra banda, o tipo de contrato é unha das variables determinantes do nivel salarial, segundo constata a estatística. Os salarios son superiores para persoas con contrato indefinido. Mentres, o salario medio das persoas con xornada a tempo parcial en Galicia é menor que o das persoas con xornada a tempo completo.

VIDAS LABORAIS

Por outra banda, a explotación da mostra continua de vidas laborais reflicte que o 17,8% dos galegos que en 2019 estiveron afiliados en alta laboral por conta allea percibiu un salario total menor ou igual aos 6.000 euros anuais. 

Entre a poboación traballadora que só estivo afiliada en alta laboral parte do ano, esta porcentaxe sobe ata o 40,5%, mentres que para os que estiveron afiliados o ano completo é do 2,7%. Para este último colectivo, o intervalo modal (o de maior frecuencia) é o de 20.000 a 30.000 euros, no que se atopa o 26,8% das persoas que estiveron afiliadas en alta laboral durante 2019, seguido de preto polo grupo que percibiu de 15.000 a 20.000 euros (no que se atopa o 24,3%).

En 2019, a media do salario bruto anual foi de 20.588 euros para os homes e 16.236 para as mulleres (4.352 euros menos para o sexo feminino). Ao restrinxir a análise ás persoas que estiveron afiliadas en alta laboral por conta allea durante todo o ano, a diferenza é maior: 27.090 euros para homes e 21.568 para mulleres, isto é, 5.522 euros menos.

Dos sete concellos con máis poboación, A Coruña presentaba en 2019 o salario bruto máis alto, con 22.187 euros anuais de media; seguido de Santiago, con 21.921. No extremo oposto atopábase Ferrol (17.821 euros/ano), que é, con Lugo (18.462 euros/ano), o único concello onde o salario medio sitúase por baixo da media galega.