Concentración ante a Xunta polo "maior ataque ao ensino público dos últimos anos"
CC.OO. Ensino acusa á Consellería de non cubrir as baixas médicas de profesores, con máis de 240 prazas baleiras dende o pasado 30 novembro.
Por E.P. | SANTIAGO DE COMPOSTELA | 15/12/2021 | Actualizada ás 13:29
Delegados de CC.OO. Ensino concentráronse este mércores ante a sede da Consellería de Cultura, Educación e Universidade en Santiago de Compostela para esixir a cobertura de baixas médicas nos centros docentes do territorio. O sindicato denunciou que a Xunta leva sen cubrir vacantes de todos os corpos de persoal docente desde o pasado 30 de novembro e que actualmente hai unhas 240, 136 no corpo de mestres e outras 104 en secundaria.
Esta organización advertiu, ademais, que esta situación se estende a algunhas interinidades que abarcan todo o curso académico, "co prexuízo grave cara ao alumnado que isto significa". A iso sumou, ademais, a non prolongación do programa ARCO de apoio, reforzo de competencias e orientación, a pesar de que os centros educativos así o demandan.
O sindicato censurou o que supón, ao seu xuízo, "o maior ataque ao ensino público dos últimos anos" e unha volta aos recortes iniciados a principios de curso, coincidindo ademais coa sexta onda da pandemia. Ante o silencio da Xunta, o sindicato concentrouse ante a sede da Xunta en San Caetano e solicitou á Valedora do Pobo que interceda ante a administración galega na cuestión das incapacidades temporais e a ampliación do programa ARCO.
Outras organizacións, como o sindicato CIG-Ensino e a confederación Anpas Galegas, tamén denunciaron esta situación nas últimas semanas. Así mesmo, a Consellería de Educación trasladou a Europa Press o pasado venres que "durante toda a pandemia a Xunta cubriu con gran axilidade as baixas, ás veces mesmo esgotando listas". "Neste momento non existe un problema neste sentido, dado que os positivos por covid concéntranse no alumnado menor de 12 anos, non no colectivo do profesorado", sinalaba o Goberno galego.
