Por Galicia Confidencial | Compostela | 25/04/2022 | Actualizada ás 22:00
Preparar unha oposición é unha das posibilidades con maior saída laboral para os vindeiros anos. Segundo un estudo realizado por UNITOUR, o 28% dos estudantes de bacharelato españois ten pensado opositar cando finalice o seu grao, cifra que diminúe a un 21% entre os mozos universitarios e recentemente licenciados, segundo o informe da Feria de Estudios de Posgrado FIEP 2020.
Por iso, o sector público é unha das opcións máis atractivas para o novo mercado laboral. "Ten beneficios e garantías como o acceso a unha atractiva remuneración, a estabilidade no posto de traballo, o dereito total a vacacións, seguridade sobre a xubilación e cotización na Seguridade Social, bo horario, entre moitos outros. Por iso a xente se anima a preparar oposicións", sinalan desde CEAC, un instituto especializado en preparar a candidatos e candidatas.
As xubilacións masivas que deberá afrontar o Sector Público nos próximos anos expoñen un escenario de oportunidades para moitas administracións. Os datos estatísticos mostran que máis do 50% dos empregados públicos en todo o Estado, algo máis dun millón de funcionarios, cumprirán a idade de xubilación entre este ano e o 2030, o que nos dá unha media de máis de 120.000 xubilacións cada ano.
Este envellecemento xeral do funcionariado implica unha substitución xeracional que debería facer que o número de prazas aumente nas seguintes convocatorias. Ademais, o adiamento dos procesos selectivos de 2020 a 2021 xerou que a suma total de prazas ofertadas aumente considerablemente para as oposicións de 2022. A Oferta Pública de Emprego e as prazas acumuladas nos últimos anos fan que teñan que ir saíndo até 56.000 prazas de funcionarios entre este ano e os seguintes.
MÁIS DE 21.000 PRAZAS ESTE 2022
Xa hai máis de 21.000 prazas confirmadas para este 2022, e o número vai en aumento nas principais convocatorias de oposicións. Entre elas, destaca Correos que convocou a súa maior oferta de emprego público en décadas, con 5.377 prazas. De Auxilio Xudicial, aínda non se publicou no Boletín Oficial do Estado, pero a previsión é que este ano haxa máis de 1.800 prazas para as oposicións. Ademais, están as probas a Policía Nacional e Garda Civil aínda non hai anuncio, pero prevese que as probas para a Policía Nacional serán nos meses finais de 2022, mentres que as de Garda Civil espéranse para o verán. Para o resto de oposicións, aínda non hai anuncio oficial, aínda que o máis seguro é que as probas sexan entre verán e finais de 2022.
En Galicia, a Consellería de Educación anunciou só para este ano a convocatoria de 2.628 prazas divididas en varios grupos. O máis numeroso é o dos ensinos secundarios, con 1.171 prazas de 29 especialidades, de Matemáticas (136 postos, o máis numeroso) a Portugués (4). Séguelle en importancia numérica o capítulo de mestres, con 950 prazas (250 de primaria e 180 de infantil) e complétase con 300 postos de promoción interna, 144 de profesores técnicos de FP, 45 de docentes das escolas de idiomas, 10 para inspección e 8 para artes plásticas e deseño.
As probabilidades de obter praza tamén dependen das circunstancias en que se dea o proceso selectivo. "Avecíñanse máis oposicións que nunca. Este 2022 é ideal para opositar xa que se terán moitas máis posibilidades de conseguir unha praza. Os períodos de tempo cunha maior cantidade de xubilacións, a dispoñibilidade de prazas dispárase e aparecen máis oportunidades e convocatorias", indican desde CEAC.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.