Perde un móbil de mil euros e simula o seu roubo para tentar que o seguro se faga cargo

Axentes da Policía Nacional da Comisaría de Vilagarcía de Arousa investigan un veciño do concello como presunto autor dun delito de simulación de infracción penal. A finais de abril, o home denunciou ser vítima dun roubo con violencia.

Segundo o seu relato, cando camiñaba pola rúa ás 22.00 horas foi abordado por detrás por un mozo vestido con roupa deportiva que lle propinou unha patada e tirouno ao chan mentres lle berraba: "Dáme todo o que tes".

Nesa denuncia, o veciño de Vilagarcía relataba que lle subtraeron un teléfono móbil valorado en 1.000 euros e a carteira con documentación e 20 euros.

Por mor da denuncia, os axentes iniciaron as investigacións para o esclarecemento dos feitos. Tras comprobar as cámaras da contorna do porto, citaron novamente na comisaría á presunta vítima, quen recoñeceu presentar unha denuncia falsa co obxectivo de tentar que o seguro se fixese cargo do móbil, xa que o extraviou ese mesmo día.