A Deputación de Pontevedra recupera a atención presencial e suprime a obrigatoriedade de pedir cita previa
O ORAL seguirá precisando deste trámite anticipado.
Por E.P. | SANTIAGO DE COMPOSTELA | 22/05/2022 | Actualizada ás 20:55
A Deputación de Pontevedra anunciou que recupera a atención presencial directa en todos os seus servizos e suprime a obrigatoriedade de concertar cita previa, excepto no ORAL, onde continuará para "manter o nivel de calidade alcanzado na atención especializada ás persoas contribuíntes".
Así, nun comunicado, a administración provincial sinala que, unha vez decaídas a maior parte das restricións sanitarias con motivo da pandemia, pretende contribuír tamén desta maneira á recuperación da plena normalidade na relación coa cidadanía.
Máis de 160.000 persoas foron atendidas desde que o pasado 1 de xuño de 2020, durante a última prórroga do estado de alarma, se implantara o sistema de cita previa, xunto co traballo en remoto para o persoal, co que estiman que 6.000 traballadores puideron continuar desempeñando as súas funcións durante a etapa posterior ao estado de alarma.
