Presentan a primeira tradución ao galego de 'Os límites do crecemento', o informe que anticipou o colapso do planeta

Juan Casares Long e José A. González son os autores da tradución deste informe publicado en 1972 que anticipou a necesidade de declarar a situación do planeta como de emerxencia.

Por Europa Press / Redacción | Santiago de Compostela | 14/06/2022 | Actualizada ás 21:05

Comparte esta noticia

Os profesores Juan Casares Long e José A. González presentaron este martes 'Os Límites do Crecemento', a primeira tradución ao galego do Informe para o proxecto do Club Roma sobre os retos da humanidade.

Presentación da primeira tradución ao galego de 'Os límites do crecemento'
Presentación da primeira tradución ao galego de 'Os límites do crecemento' | Fonte: Xunta de Galicia.

En 1972, Donella H. Meadows, Dennis L. Meadows, Jorgen Randers e William W. Behrens III, integrantes do Instituto de Tecnoloxía de Massachussets, publicaban 'The limits to Growth', unha obra que sintetizaba o denominado Informe Meadows realizado a petición do Club de Roma para analizar os retos da humanidade de cara ao futuro. Cincuenta anos despois, chega a primeira tradución ao galego deste texto que se anticipou na necesidade de declarar a situación do planeta como de emerxencia.

A obra foi presentada nun acto celebrado en Santiago de Compostela, no que participou o presidente da Xunta, Alfonso Rueda, quen aproveitou para destacar o compromiso do Goberno galego coa conservación do planeta para deixar unha "Galicia mellor para as próximas xeracións".

A este respecto, explicou que esa implicación da Administración galega con facer un mundo máis sustentable se reflicte na Estratexia galega de economía circular 2020-2030, a Lei de residuos e chans contaminados ou as medidas para loitar contra o cambio climático como a Estratexia galega de cambio climático e enerxía 2050, o Pacto das Alcaldías para o Clima, a Alianza Galega polo Clima ou a futura Lei de Clima de Galicia.

Neste sentido, Rueda reflexionou sobre a necesidade de adoptar medidas, entre todos, para non chegar ao colapso do que advirte o informe ante os sinais de emerxencia que o planeta lanza nos últimos anos, como o feito de que Galicia, "o país do mil ríos e tradicionalmente de choivas", rexistre episodios de prealerta de seca.

"Avisos temos suficientes, a responsabilidade das Administracións é tentar aplicarse nas políticas e facer pedagoxía", afirmou, mostrando a importancia de dar exemplo nas decisións que se toman para que os cidadáns se conciencien de que se trata dun labor colectivo.

Por último, agradeceu aos profesores Juan Casares Long e José A. González a tradución desta obra á que cualificou como un clásico da investigación científica que soubo adiantarse aos retos que ía ter por diante a humanidade. "Grazas por facer esta pequena aventura de traducir este libro ao galego", abundou.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta