Comesaña di que a sanidade "funciona" e afea "argumentos falsos" para "desprestixiala"

O conselleiro de Sanidade, Julio García Comesaña, lanzou unha mensaxe de "tranquilidade" á poboación galega porque, aínda que recoñeceu que a sanidade pública "pasa por un momento complicado sempre que chega o verán", o sistema sanitario galego é "forte" e "demostrouno, con nota, na pandemia". Agora, confía en que durante estes meses de verán, "de novo", a sanidade galega "sexa capaz de atender a demanda".

Nunha entrevista na Cadena Ser recollida por Europa Press, o conselleiro asegurou que a cidadanía galega "poden ir tranquila" aos seus centros de saúde e tamén aos hospitais de Galicia. En todo caso, García Comesaña sinalou que existe "un problema de médicos especialistas" pero, insistiu en que "a chave de cantos se forman e como se forman" a ten o Ministerio de Sanidade.

Nesta mesma liña, lembrou que "desde hai anos" a Xunta reclama "máis capacidade para formar" porque, continuou, "víase que iamos chegar a esta situación porque cando un médico se xubila, non hai outro médico para substituír". Así, reivindicou que a Xunta "está a pór en marcha medidas e solucións para atallar isto". Entre elas, "ofrecer aos MIR de Familia un contrato cunha praza en propiedade e unha retribución razoable: o que cobra un médico de Familia que faga dous gardas ao mes".

"A OPOSICIÓN ESTÁ COLAPSADA"

Por outra banda, cuestionado sobre se os médicos non quedan en Galicia tras formarse debido ás condicións laborais e salariais, o conselleiro de Sanidade argumentou que a oposición "está colapsada coa Atención Primaria".

"Levan tanto tempo dicindo que estamos a desmantelar a sanidade, que chega a pandemia e saímos con nota, así que teñen dúas opcións: dicir que se equivocaron e mentiron ou sostelo e non emendalo, que é o que están a facer", criticou. Ademais, Comesaña censurou que a oposición utilice "argumentos falsos" para "desprestixiar a sanidade pública". Así, volveu insistir en que a sanidade pública "funciona".

"Estamos a facer un esforzo. Na sanidade pública galega hai 6.500 traballadores máis que no 2009 e investimos 850 millóns de euros máis que no 2009. Se iso é desmantelar e non ter unha sanidade publica de calidade...", puntualizou.

Sobre este mesmo tema, volveu negar que os médicos que se forman en Galicia marchen polas condicións e os salarios. Neste sentido, xustificou que "o 90% dos médicos galegos formados en Galicia están aquí traballando". Iso si, matizou que "unha porcentaxe importante" traballa en Urxencias e non en Atención Primaria.

Ante isto, demandou unha vez máis ao Goberno central que "cre a especialidade de Urxencias", xa que nestes momentos "se un médico quere traballar en Urxencias só ten a vía de formarse en Atención Primaria".

4º DOSE COVID

Por outra banda, Julio García Comesaña confirmou que a partir de outono recibirán a cuarta dose da vacina da covid-19 as persoas maiores de 80 anos.

O conselleiro lembrou que iso é o que acordaran as comunidades na Comisión de Saúde Pública. A pesar disto, non concretou unha data, posto que dependerá de cando estea dispoñible "unha vacina bivariante", isto é, "que conteña a variante orixinal e a variante ómicron".

En todo caso, García Comesaña avanzou que se non chegase este tipo de vacina "probablemente" recorran ás vacinas dispoñibles nestes momentos.

O conselleiro de Sanidade, Julio García Comesaña, durante unha entrevista con Europa Press. Salomé Montes - Europa Press