O empresariado de Ourense demanda "infraestruturas modernas e boas comunicacións"
Vén de presentarse o estudo 'Emprendemento rural, a situación actual e as súas perspectivas de futuro' por parte da UVigo e dos grupos de investigación GEM Uvigo e GEM Galicia.
Por E.P. | SANTIAGO DE COMPOSTELA | 06/07/2022 | Actualizada ás 19:40
A Confederación de Empresarios de Ourense acolleu este mércores a presentación do estudo sobre o 'Emprendemento rural, a situación actual e as súas perspectivas de futuro', un estudo realizado por profesores da Uvigo e membros dos grupos de investigadores GEM Uvigo e GEM Galicia, que considerou clave a potenciación de financiamento específico para comarcas rurais e o aproveitamento de fondos europeos para facilitar o desenvolvemento territorial.
Así o explicou Alberto Vaqueiro, un dos autores do estudo e profesor da Uvigo, que destacou que "o principal lastre" para o emprendemento rural é "a falta de infraestruturas e servizos nesta contorna", o que leva á falta de iniciativas. Entre outros factores que frean o emprendemento, destacou "especialmente a sensación de medo ao fracaso", algo que apuntou que "hai que combater non penalizando o emprendedor posto que fracasar non é malo".
Neste mesmo sentido, expuxo que á hora de emprender "resulta máis complicado facelo no rural que en contornas urbanas" e que durante o período crítico da pandemia "se incrementou esta dificultade, pero agora vese unha repunta de posibilidades que hai que aproveitar".
A publicación realizaba unha análise da situación con datos da Rede GEM de 2019-2021, na que se pon de manifesto as características de emprendemento en municipios do ámbito rural, recollendo a perspectiva da poboación, a súa implicación en proxectos empresariais, o perfil das persoas que emprenden, os motivos polos que o fan, as características das actividades que desenvolven e a súa percepción de dificultades e expectativas xerais.
O profesor investigador de Economía Aplicada, Alberto Vaqueiro, integrante deses grupos, participou no estudo a nivel estatal baseado en once mil enquisas que considerou clave "potenciar un financiamento específico para as comarcas rurais, así como o aproveitamento dos fondos europeos para facilitar o desenvolvemento territorial".
Así pois, segundo o estudo, un 15% da poboación do rural desenvolve algún tipo de actividade emprendedora, mentres que un 7% expresou a súa intención de facelo, e aínda que a pandemia reduciu o emprendemento potencial "consolidou o daquelas iniciativas que xa estaban presentes".
O estudo tamén reflicte que hai máis mulleres que homes iniciando novas iniciativas e que un terzo das actividades recentes están realizadas por menores de 35 anos, aínda que a idade media de quen mostran interese en emprender é de 38 anos e as das actividades xa consolidadas de 50, o que para os investigadores "denota unha dificultade engadida en idades máis novas, precisamente aqueles que máis dificultades teñen para abrirse un oco no mercado laboral" e "precisamente reconectar á mocidade co territorio é básico para fixar poboación".
LIÑA DE CRÉDITO ESPECÍFICA
Vaqueiro urxe unha "liña de crédito específica para apostar polo emprendemento no rural" onde di que as necesidades de financiamento "son inferiores" ao medio urbano pero "hai certa dependencia dos recursos propios" sobre os préstamos bancarios.
A presentación do estudo realizouse na Confederación de Empresarios de Ourense onde a súa presidenta, Marisol Novoa, foi clara ao afirmar que "sen rural non hai futuro", e é por iso que demanda que "conte con servizos infraestruturas modernas e boa conexión a internet, comunicacións propias deste século para que resulte atractivo investir e emprender nel".
