Prisión para unha muller por cinco incendios que arrasaron mil hectáreas en Verín

A Garda Civil, no marco da operación Ignis, detivo unha muller como presunta autora de cinco delitos de incendio forestal e sete delitos de danos --polas vivendas e vehículos afectados-- na comarca de Verín. A superficie calcinada polo lume é de 1.000 hectáreas. Pola súa banda, o xulgado número 1 de Verín decretou o ingreso en prisión provisional da detida por estes feitos.

Segundo informa a Garda Civil nun comunicado, os incendios producíronse os días 3 e 4 de agosto e afectaron as poboacións de Verín, Rasela, Cabreiroá, Abedes e Sousas. A Consellería de Medio Rural detalla que estes múltiples focos uníronse nun só lume. De feito, chegouse a declarar o nivel 2 de emerxencias debido á proximidade das chamas ás vivendas e ás zonas afectadas.

Nos incendios, diferentes persoas tiveron que recibir asistencia médica e resultaron calcinadas varias vivendas e vehículos. Na investigación, a Garda Civil contou coa estreita colaboración dos axentes da Unidade de Investigación de Incendios Forestais (UIFO), da Xunta de Galicia.

VALORACIÓN DA XUNTA

Nun comunicado, o Goberno galego destacou o traballo dos investigadores da UIFO para esclarecer o sucedido. As pescudas iniciáronse cando se realizaban labores de control e extinción. Así, a muller utilizaba o seu vehículo para desprazarse polo municipio e foi vista en varias ocasións polos investigadores polas zonas de inicio dos lumes. "Esta rápida chegada ao lugar e a colaboración da cidadanía foron fundamentais no avance das investigacións", resalta Medio Rural.

"TODO O PESO DA LEI"

O conselleiro de Medio Rural, José González, destacou tamén este martes os "indicios moi sólidos" que fan que os xuíces decreten prisión provisional sen posibilidade de fianza para os últimos incendiarios detidos en Galicia, unha muller por lumes na comarca de Verín e tres homes por lumes en Ribas de Sil e Trives.

A preguntas dos medios nun acto en Oímbra, o conselleiro avisou de que "hai máis liñas de investigación abertas, hai máis xente investigada nalgúns dos incendios máis importantes deste verán". "Imos por eles con todo o peso da lei. Imos entre todos terminar con esta secuela dos incendios", agrega.

Respecto diso, subliña o papel "clave" a Unidade de Investigación de Incendios Forestais (UIFO), en colaboración cos corpos e forzas de seguridade, de forma que "as liñas de investigación están a dar os seus resultados". "Que saiban clarísimamente que imos por eles", di aos incendiarios. Ademais, González agradece a colaboración cidadá que foi "extraordinaria" para poder levar a cabo a detención da muller polos lumes en Verín, "un dos incendios mais perigosos desta tempada", cun milleiro de héctareas arrasadas.

O conselleiro de Medio Rural advirte ás persoas incendiarias de que "caerá sobre eles todo o peso da lei", "non só con penas privativas de liberdade, senón coa responsabilidade patrimonial". E é que expón que se deberá facer fronte a gastos de extinción por importe de 535.000 euros no caso de Verín, ao que se une danos en naves e vehículos. Igualmente, lembra que o lume do ano pasado en Ribas de Sil --polo que se produciron detencións a pasada semana-- tiveron un custo de máis dun millón de euros.

José González remarca que nestes casos hai unha "intención de causar, sen ningunha dúbida, danos ás persoas e os bens", nun contexto de condicións climatolóxicas favorables para o lume.

DELEGADO DO GOBERNO

Pola súa banda, o delegado do Goberno en Galicia, José Miñones, trasladou este martes as súas felicitacións á Garda Civil polo seu "enorme traballo" na persecución dos autores de incendios forestais e lanzou tamén unha mensaxe: "Que se saiba, que aquel que queima o monte terá a súa consecuencia".