Os acusados da macrocausa de estafas a seguros na provincia de Ourense evitan a prisión cun acordo

A Audiencia Provincial de Ourense acolleu este luns o xuízo contra dez acusados por delitos de estafa continuada, falsidade documental e falsidade mercantil na chamada Operación Aleta, unha macroestafa a compañías aseguradoras da provincia de Ourense que comezou a investigarse hai máis de doce anos. A vista, con todo, non se chegou a celebrar, xa que os acusados chegaron a un acordo para evitar a prisión.

A macrocausa levaba a xuízo un procedemento que trataba de esclarecer trinta e seis presuntos accidentes con diferentes persoas involucradas e organizadas para, supostamente, estafar a aseguradoras. Foron os investigadores do equipo de delitos contra o patrimonio da xudicial, apoiados no GIAT e outras unidades, os que destaparon a rede.

A investigación comezou no ano 2010 e mantívose ata o ano seguinte baixo segredo de actuacións no xulgado do concello ourensán de Trives. Agora chegara a xuízo coa atenuante de dilacións indebidas, tras pasar máis de 12 anos.

Os investigados finxían "presuntamente inexistentes sinistros" para reclamar e conseguir indemnizacións, tanto por sinistro total como pola reparación do vehículo. Para iso servíronse de saídas de vía, lesións inexistentes e colisións, todas elas sucedidas en distintos lugares da provincia.

Segundo recolle o escrito fiscal, aproveitábanse de que o principal acusado tiña un taller de compravenda e reparación de vehículos e outro dos acusados tiña un irmán con outro taller. Ambos realizaban os partes.

Os dez acusados pasaron este luns polo banco da Audiencia Provincial de Ourense, pero fixérono para conformarse cunha pena rebaixada. O principal acusado, o que segundo Fiscalía realizou a maioría dos partes, aceptou cinco meses e 16 días de prisión por un delito continuado de estafa polo que, nun principio, solicitaban oito anos. Ademais aceptou unha multa de tres meses a razón de catro euros día polos delitos de receptación e falsificación documental, polos que se lle imputaban catro anos de cárcere, dous por cada un dos delitos.

En canto á responsabilidade civil, a Fiscalía determinou que se realice de forma solidaria cos demais promotores do delito, pero que o principal acusado responda co seu patrimonio por un total de máis de 210.000 euros e, deles, 160.000 de forma directa. O total da responsabilidade civil que pide o ministerio público alcanza os 300.000 euros.

Os outros nove acusados aceptaron tamén rebaixas a cambio de recoñecerse culpables. Catro deles aceptaron multas de entre 100 e 300 euros ao longo de mes e medio desde a efectividade da sentenza, mentres que outros tantos deberán estar localizados de forma permanente no mesmo prazo.

Ademais a muller do principal acusado, que se enfrontaba a un ano e nove meses por estafa en concurso con falsificación, foi absolta sen multa.