As traballadoras das Galiñas Azuis e atención a maiores volverán á folga en outubro

A folga convocada pola Sección Sindical da CNT no Consorcio Galego de Igualdade e Benestar chega ao seu fin tras 15 días de protestas que alteraron o funcionamento das Galiñas Azuis, centros de día e residencias. As traballadoras, recolle o sindicato nun comunicado, amósanse "moi afectadas" pola negativa das autoridades competentes para a

negociación, e lémbranlles que "non teñen nada que perder": "Coa convocatoria que expoñen, en decembro estamos todas na rúa".

Dende o sindicato denuncian, ademais, "represalias" ao exercicio do dereito de folga, como a negativa aos días de asuntos propios. "Demandaremos ao xerente Perfecto Rodríguez por adoptar esta medida, ao tempo que nos poñemos a disposición de todo o persoal para demandar as denegacións deste dereito", sinala a CNT.

A folga, que comezara o día 5 de setembro e que se prolongou ata o venres 16, continuará en outubro, do luns 3 ao venres 14, en novembro do luns 2 ao venres 11, e en decembro do 12 ao venres 23. Dende o sindicato piden ás familias usuarias dos servizos que "preparen alternativas" para outubro, por se os centros non conseguiran funcionar con normalidade, xa que "o ambiente é desesperado e é imposible controlar as accións individuais".

Entre os motivos que enumeran dende a Sección Sindical da CNT no Consorcio para seguir coas protestas está que o xerente non solicitara a Función Pública a convocatoria dun proceso selectivo propio. Tamén consideran que está a "desatender" as súas funcións declarándose incompetente para negociar, "cando é o único que pode resolver o tema da temporalidade do persoal, como están facendo as xerencias doutros entes instrumentais", sinalan.

Ademais, informan de que o único que pode parar esta folga é cumprir as reclamacións do persoal: garantía dunha convocatoria única e específica, garantía de oposición non eliminatoria, que se contabilice a formación impartida polo propio Consorcio, retirada do concurso de traslados, baremación xusta na que a experiencia contabilice o 90% e que se contabilice a antigüidade no Consorcio o triplo que en calquera outra administración.