Angrois: O exdirector de Adif nega competencias na avaliación de riscos e culpa o maquinista

O ex director de seguridade na circulación de Adif Andrés Cortabitarte, acusado o xuízo polo accidente do tren Alvia ocorrido en Angrois en xullo de 2013, asegurou que non tiña competencias na avaliación de riscos da liña.

A preguntas do fiscal Mario Piñeiro, no xuízo polo que tamén está acusado o maquinista --a ambos impútanselle 80 homicidios por imprudencia profesional grave--, Cortabitarte negou que a dirección de seguridade á fronte da cal estaba tivese responsabilidade na "avaliación nin a análise de ningún risco".

En calquera caso, admitiu que "si, entre outras cousas", tiña competencias na seguridade da liña Ourense-Santiago, na que se produciu o sinistro, no que morreron 80 persoas e resultaron feridas máis dun centenar persoas. A cuestións sobre o certificado de seguridade, sinalou que o que emitiu el "non é o certificado de seguridade da liña", aínda que recoñeceu que sen el, a liña non podería porse en servizo. "Porque é un máis dos catro, seis... oito certificados que se emiten aí. É un máis. Todos son necesarios", resolveu.

Ademais, Cortabitarte alegou que o deseño da curva da Grandeira se acometeu "cunha marxe de velocidade" e "seguridade" de entre 80 e 160 quilómetros por hora. Isto quere dicir, tal e como proseguiu, que "non pasaba nada" se o convoi circulaba a máis de 80 quilómetros por hora, porque ata os 160 "o administrador e a normativa asume os erros de condución". "Por encima de 160, xa é outro risco", engadiu o exresponsable de seguridade de Adif.

CONTRA O MAQUINISTA

Así, Cortabitarte apuntou ao maquinista como responsable do accidente pola velocidade que levaba e porque foi "falando durante 100 segundos" co interventor de Renfe por teléfono. "Iso é o impensable: falar 100 segundos. Ademais, nunha conversación de algo que vai ocorrer hora e media despois. Iso non pode facelo, é que é ilegal facelo", esgrimiu Cortabitarte, a responder a preguntas do fiscal Mario Piñeiro. 

O maquinista declarou a pasada semana que isto era obrigatorio, pero este xoves o responsable de Adif insistiu en que "é ilegal" e que lle provocou "perder toda a situación" do convoi. Isto foi o que levou a Garzón, segundo Cortabitarte, a "frear aos 100 segundos". "Se frease catro segundos antes, non estariamos aquí (no xuízo). Estamos aquí por catro segundos", sentenzou.

Na súa declaración como acusado, defendeu que o maquinista, Francisco José Garzón, tiña a "habilitación" para circular nesa liña, igual que no ano 2013 "había 116 maquinistas habilitados" para iso. Ademais, aseverou que tiña que ser el quen adecuase a circulación do Alvia ao cadro de velocidades ao pasar pola curva da Grandeira, da que negou que tivese algunha "peculiaridade" con respecto ás outras 1.800 curvas que hai no sistema ferroviario "con esas características".

A UTE SIEMENS-DIMETRONIC

Durante a súa declaración, o ex alto cargo de Adif tamén descargou responsabilidades tanto na unión temporal de empresas (UTE) que conformaban Siemens e Dimetronic --encargada de entregar un dossier de seguridade a Adif-- como no avaliador independente, Ineco, que fixo outra análise de riscos.

"Que a UTE elabore o dossier de seguridade e logo haxa unha avaliación independente non significa que vostedes teñan que aceptar iso sen máis", chegouno a reprender o fiscal, para atribuírlle unha "actuación pasiva". "Non, non é así. Nós non imos avaliar ao avaliado. Iso é un feito fundamental. A UTE Siemens-Dimetronic cando fan o dossier de seguridade fano a través dun proceso", escudouse Cortabitarte.

Dando longas explicacións ante o interrogatorio concreto do fiscal, tamén diluíu responsabilidades no seo da súa empresa ao afirmar que "non hai unha soa persoa que asine" un certificado de posta en servizo da liña. "Non a imos atopar no Adif", dixo, antes de insistir en que o seu é "unha parte", que circunscribiu, ademais, ao subsistema de control, mando e sinalización.