Angrois.- Un técnico di que o 'ERTMS' desconectouse sen consultar á empresa fabricante, que presentou correccións
"A desconexión non nola anunciaron, só nos informaron de que se desconectou, da decisión de desconectala (...) non nos consultaron", aseverou o empregado de Bombardier.
Por Europa Press / Redacción | SANTIAGO DE COMPOSTELA | 08/11/2022 | Actualizada ás 15:29
O empregado de Bombardier Jaime Moñus --da compañía responsable do deseño e instalación do 'ERTMS' embarcado no tren Alvia que descarrilou en xullo de 2013 en Angrois-- afirmou que a desconexión deste sistema de seguridade produciuse sen consulta previa á firma. Ademais, asegurou que despois non foron aplicadas as medidas correctoras que se propuxeron.
Sinalouno a preguntas do avogado da plataforma de vítimas, Manuel Alonso Ferrezuelo, na súa declaración en calidade de testemuña no xuízo polo sinistro ferroviario, no que morreron 80 persoas e 145 resultaron feridas.
"A desconexión non nola anunciaron, só nos informaron de que se desconectou, da decisión de desconectala (...) non nos consultaron", aseverou Moñus, quen compareceu despois de dúas longas declaracións de dous traballadores da unión temporal de empresas (UTE) que forneceu o 'ERTMS' na vía, que foi a conformada por Thales e Dimetronic (na actualidade Siemens).
Na súa intervención, este traballador lembrou que Bombardier "propuxo dúas medidas" unha vez detectadas as incidencias, que xeraban atrasos: o adiamento das balizas algo máis dun metro "para que ese espazo dun segundo non estivese xusto encima delas" --de modo que non se producise unha incidencia-- e reducir polo maquinista a velocidade de entrada de 100 a 75 quilómetros por hora, tamén "para que ese espazo dun segundo estivese antes e as balizas puideran lerse correctamente".
De implantarse algunha destas dúas medidas, segundo dixo, "si" se podería circular con 'ERTMS' embarcado, aínda que descoñece por que non se adoptou ningunha destas decisións. Segundo consta no sumario, o director de seguridade de Renfe solicitou a desconexión do 'ERTMS' embarcado e autorizouno o seu homólogo en Adif, Andrés Cortabitarte --no banco dos acusados xunto ao maquinista Francisco Garzón--.
Jaime Moñus engadiu, durante o interrogatorio do letrado que representa á plataforma de vítimas, que meses despois "se entregou a versión corrixida do software" que "liquidaba todas as incidencias", pero o sistema seguía desconectado cando se produciu a traxedia.
Sen estar "moi seguro" de cal foi o motivo para non implantar estas correccións, este empregado apuntou que cre que se dixo que era "demasiado complexo para o maquinista". "Que era moi complexo o cambio, pero non estou moi seguro", incidiu.
"CON RENFE, NON CON ADIF"
Por parte de Adif, a avogada do estado trasladoulle a cuestión de quen era o cliente de Bombardier, ao que este traballador sinalou que o consorcio Talgo-Bombardier tiña como destinatario final a Renfe. "Vostedes todas estas cuestións trátanas con Renfe, non con Adif", concluíu a letrada.
Aínda a preguntas do avogado da plataforma, e tamén noutro punto á representante de Adif, este empregado indicou que o que ocasionaba estas incidencias era un atraso de tempo, e non unha diminución de seguridade.
As incidencias consistían, en concreto, en que "o sistema detectaba que esperaba unha baliza pero que non a leu, así que freaba con freo de servizo ou freo de emerxencia ata parada".
Deste xeito, "o modo de operación xa non era de supervisión completa senón no que o maquinista é responsable", segundo expuxo. Ante isto, "dixéronnos que a solución tiña que ser inmediata".
De estar instalado, o maquinista debía recoñecer ata dúas veces nunha pantalla a transición de 'ERTMS' a 'Asfa' (no momento previo ao descarrilamento). "O primeiro é un aviso e o segundo unha confirmación necesaria", precisou.
