Empate na desolación

A bancada de maratón pechada, menos de 10.000 espectadores no campo e asubíos no minuto de silencio. Tres detidos pola malleira a Jimmy no Manzanares, e Lendoiro despedido da LFP por asistir o enterro do ultra. O Dépor empatou cun gol de Toché e a eliminatoria decidirase na volta o día 18.

Por gcdeportes | A Coruña | 04/12/2014 | Actualizada ás 08:36

Tres días despois da traxedia no Manzanares, volveu o fútbol a Riazor, envolto na desolación polos tristes acontecementos. A estrea do Dépor na Copa do Rei foi ben fría: principiou cun minuto de silencio con asubíos, coa bancada de maratón, a que ocupaban os ultras, pechada, e rematou coa nova de que a LFP despedira o seu embaixador, Augusto César Lendoiro, por asistir o soterramento de Francisco Javier Romero Taboada, morto na pendencia entre Riazor Blues e o Frente Atlético. Os preto de 10.000 afeccionados asubiaron co anuncio do minuto de silencio, que rematou con algúns afeccionados pedindo a dimisión do presidente Tino Fernández.

O despido de Lendoiro

Dúas horas antes do partido, familiares, amigos e a peña de Riazor Blues despediron a Francisco Javier Romero Taboada, de 43 anos, no camposanto de Feáns. Un adeus na intimidade pero que, sen representación oficial do club, si contou coa presencia do ex-presidente do Deportivo Augusto César Lendoiro, ata hoxe mesmo embaixador da LFP. Foi durante o partido cando se coñeceu a nova: Javier Tebas, presidente da LFP, despediu de xeito fulminante a Augusto César Lendoiro, aducindo que a patronal do fútbol non pode permitir que o seu embaixador acuda ao soterramento dun ultra.

Mentres, a Policía detivo en Pozuelo (Madrid) a tres irmáns pola súa relación coa malleira que provocou a morte do afeccionado do Deportivo na pendencia na ribeira do Manzanares. Segundo fontes policiais, testemuñas presentes e membros do Frente Atlético vinculan alomenos a dous dos irmáns, dos máis violentos do grupo neonazi, coa agresión mortal a Jimmy.

Ficha técnica
Deportivo 1: Lux; Laure (José Rodríguez, 65'), Diakité, Lopo, Manuel Pablo; Álex Bergantiños, Juan Domínguez; Isaac Cuenca (Postiga, 82), Juan Carlos (Remeseiro, 66), Canella e Toché.
Málaga 1: Ochoa; Rosales, Angeleri, Weligton, Boka; Samuel (Samu Castillejo, 60'), Camacho, Juanpi (Recio, 69), Horta; Luis Alberto (Portllo, 81) e Rescaldani.
Goles: 0-1: Camacho (minuto 10). 1-1: Toché (minuto 68)..
Árbitro: Mateu Lahoz (valenciano). Amarelas a Diakité (56') e Toché (76') no Deportivo e a Angeleri (43'), Rosales (51) e Portillo (88) no Málaga.
Incidencias: partido de ida dos 1/16 de final da Copa do Rei no Estadio municipal de Riazor ante 9.988 espectadores. Minuto de silencio contra a violencia no deporte.

Mereceu máis o Dépor, que comezou frío como o ánimo no estadio e encaixou un gol no minuto 10, pero que se foi entonando co paso dos minutos e Toché marcou o empate no minuto 68. O equipo de Víctor Fernández xogou con moitos teóricos suplentes, xa que o vindeiro sábado repetirá rival e escenario en partido de Liga. O 1-1 deixa a eliminatoria aberta, aínda que coa vantaxe do Málaga de ter marcado a domicilio. O gol visitante chegou a balón parado, nunha falta que rematou Camacho cos testa. O árbitro anulou un gol de Diakité por un máis que dubidoso fóra de xogo e Toché, antes de acadar o empate, tivo dúas ocasións para marcar: unha pouco antes do descanso e otra ao pouco de principiar a segunda parte. O Dépor buscou o segundo tanto que non chegou, pero o Málaga pouco arriscou no segundo tempo. A volta, o vindeiro xoves 18 de decembro.

4 Arquiveiro

Violencia fora dos campos de fútbol, sexan grupos de esquerda ou dereita (paletos hainos de todas as cores).

1 KAdT

Cantos nicks tes? o fa cha da Coruña que traballa de bibliotecario, monotema e mononeuronal.

2 Arquiveiro

EN GC so uso este nick e de fa cha teño pouco, máis tampouco son de esquerdas. Supoño que ti es de eses que xustifica a violencia sempre que sea provocada polo teu bando, eu non... Por xente coma ti somos moitos os que non queremos ir ao estadio coas nosas familias en certos partidos

3 torrente

http://www.estadiodeportivo.com/sev... Tebas (ex-militante da ultradereitista Fuerza Nueva) visitou a Del Nido no cárcere, mais logo bota a Lendoiro por ir ó soterramento dun home asasinado por un grupo neonazi.

2 deportivista

Tino dimisión! Vaite axenlloar ante a caterva mediática mesetaria ti só, non no nome do Deportivo.

1 galegoexiliado

Homenaxe a un pacifista con un minuto de silencio. A mensaxe e alta e clara para os violentos, seredes tratados como héroes. Non me estrana, hai uns días o Parlamento galego e o expañol decidiron concederlle estatus de estado ós terroristas de Jamas, e a xuventude violenta e descerebrada colleu a mensaxe, ahora a agardar polo recoñecemento do Estado Riazor Blues. Por non falar do franquimo que segue aí nas diretivas do fubol.

1 Galahaz

Sendo indiferente a orixe e equipo de fútbol da vítima, os seus antecedentes, ou que houbera unha quedada para mallarse ou non, o domingo pola mañá asasinaron brutalmente unha persoa rebentándolle a cabeza e o bazo para despois tiralo ao río. Os que agora dicides que non vos dá pena ningunha ou que o tiña ben merecido por ser un delincuente non sei que clase de empatía tendes, sinceramente. Se en vez do Jimmy este o mallado e botado ao río fose un can, seguramente moitos dos que agora amosan a súa indiferenza ou o seu desprezo para coa vítima, estarían a botar as mans a cabeza e a pór o grito no ceo. Non é un mártir nin un heroe, nin moito menos, pero creo que canto menos merece un respecto como ser humano que era, un respecto que se lle está a negar desde a maioría dos medios de comunicación e desde boa parte da sociedade, que pouco máis que están a culpar ao asasinado (que non falecido) do acontecido. Mentres, dos asasinos que seguen na rúa ninguén se lembra.

2 nazismoexiliado

Cando os nazis viñeron buscar os comunistas, eu fiquei calado; eu non era comunista. Cando eles prenderon os social-democratas, eu fiquei calado; eu non era un social-democrata. Cando eles viñeron buscar os sindicalistas, eu non dixen nada; eu non era un sindicalista. Cando eles buscaron os xudeos, eu fiquei calado; eu non era un xudeo. Cando eles viñeron a por min, xa non había ninguén que puidese protestar.