Unha aplicación para crear unha horta e un regador automático controlado polo móbil, entre os premiados nos 'I-comercio'

Nove centros educativos recolleron este luns os premios do concurso 'Idea o teu comercio', promovido pola Dirección xeral de Comercio e Consumo, que recoñecen proxectos de "comercios ideais" realizados por alumnado de 3º e 4º de ESO en categorías de Alimentación, Arte e Cultura e Téxtil.

Trátase de ideas relacionadas co comercio de proximidade que contribúan á súa contorna mentres se respecta o medio ambiente, co obxectivo de concienciar e dar visibilidade ao comercio local. En total, participaron 50 centros e 700 alumnos das catro provincias.

Na primeira categoría, a de Alimentación, resultaron premiados o IES San Paio de Tui, co proxecto 'Verdemiño', unha aplicación móbil que axuda a ter unha horta propia, así como a vender os excedentes cultivados, ademais dun espazo onde cultivar por encargo sementes propias; o IES Primeiro de Marzo de Baiona, co proxecto 'Agrobai', un espazo onde os agricultores da zona poden levar os seus produtos e o consumidor pode adquirilos; e o IES Carral, co proxecto 'Pandireta', empresa que pretende achegar o pan de Carral a todos os puntos de España.

No que respecta á categoría de Arte e Cultura, os premiados foron o IES Isaac Díaz Pardo de Sada, cun centro comercial formado por tendas e produtos 100 % galegos; o IES Tomás Terrón Mendaña, de Carballeda de Valdeorras, coa App 'Autorrego', un regador automático que se controla a través dunha aplicación; e o IES Auga da Laxe de Gondomar, que ideou unha tenda de deportes na que nun só espazo pódense comprar patíns e deslizarse pola pista.

Por último, na categoría de Téxtil, o xurado recoñeceu o traballo do IES As Insuas, coa iniciativa 'Rustics Heat', de accesorios artesanais fabricados con materiais reciclados das costas galegas; o IES Virxe da Cela de Monfero, co proxecto 'Flowers Coruxo', de pezas sustentables con estampados de figuras como toxos, grelos ou ortigas, e o IES Coruxo de Vigo, con 'Golden Fashion', unha tenda na que deseñar, personalizar, reparar ou reciclar a roupa.

"PROXECTOS ESPLÉNDIDOS"

Os premios foron entregados no Pazo de Congresos e Exposicións de Santiago polo director xeral de Comercio e Consumo, Manuel Heredia, e polo conselleiro de Cultura, Educación, FP e Universidades, Román Rodríguez, que agradeceu o traballo do profesorado que colaborou nestes proxectos "espléndidos" que "non son froito da casualidade, senón do traballo constante que se leva a cabo nos centros educativos de Galicia".

Así mesmo, destacou que os centros premiados están "moi estendidos polo conxunto da xeografía" galega, algo que, na súa opinión, reflicte que o sistema educativo galego consegue que, "con independencia do lugar onde unha persoa nace, teña as mesmas oportunidades para participar en proxectos educativos e para formarse".

Coliflores recollidas na horta | Fonte: pixabay.com