Audasa segue facendo negocio coa AP-9 e ingresa 171,8 millóns en 2022, tras a prórroga do goberno do PP
A Autoestrada do Atlántico rexistrou máis de 24.500 vehículos ao día e os beneficios creceron un 30%, ata os 66,1 millóns de euros
Por Europa Press / Redacción | Compostela | 03/04/2023 | Actualizada ás 11:26
A AP-9 rexistrou en todo 2022 un total de 24.561 vehículos por día, o que supuxo recuperar as cifras de tráfico de 2019 tras dous anos marcados polas restricións de mobilidade pola pandemia de covid-19. Isto permitiu a Audasa, a empresa concesionaria, ingresar 171,8 millóns de euros en peaxes, un 14,3% máis que en 2021. Uns ingresos a maiores que chegan logo da prórroga concedida polo goberno de José María Azanar para seguir operando nesta infraestrutura ata 2048.
Son datos presentados este luns e remitidos á Comisión Nacional do Mercado de Valores (CNMV) pola empresa, que destaca que a mellora dos resultados débese, precisamente, ao aumento do tráfico na autoestrada, que supera os niveis precoronavirus.
En concreto, o máximo da intensidade media diaria (IMD), que recolle a media de coches que circularon pola Autoestrada do Atlántico cada día, foi de 24.561. Aínda que é un 9,8% máis que en 2021, aínda supón un 9,1% menos que a media de tráfico de 2007, cando houbo marca histórico.
En canto ás cifras económicas, os ingresos creceron ata os 171,8 millóns, un 14,3% máis, e a maioría (110,9 millóns) foron por dispositivos de telepeaxe. Ademais, os beneficios situáronse en 2022 nos 66,1 millóns de euros, un 30% máis que o ano anterior.
OUTRAS CIFRAS
En 2022, Audasa achegou un total de 59 millóns de euros en impostos e cotizacións sociais: 55,9 millóns polo Imposto de Sociedades, IVE e IRPF; 2,7 millóns en seguros sociais dos seus empregados; e 0,4 millóns por IBI e IAE ás administracións locais.
No que respecta ao persoal, o número de traballadores subiu un 1,7% ata os 233 e ascendeu a presenza feminina, que se situou no 43% --en 2021 era do 40%--.
O diñeiro dedicado a actuacións e melloras na vía aumentou nun 15%, ata os 6,1 millóns de euros durante o exercicio, incluíndo os investimentos (4,4 millóns) e as accións ambientais (1,7 millóns).
Os clientes da AP-9 que abonaron o ano pasado as peaxes con dispositivos de telepeaxe (Vía-T), creceron ata o 69,5% de todas as viaxes de 2022. Xunto a isto, Audasa incrementou nun 22% a cifra que dedicou a bonificar aos seus clientes --un 25% en traxectos de ida e volta--, achegando 6,8 millóns de euros en descontos comerciais en 2022 e que se suman ás bonificacións achegadas polo Estado.
