A Xunta rexeita incrementar o investimento ao transporte tras desconvocarse a folga

A conselleira de Infraestruturas e Mobilidade, Ethel Vázquez, celebrou a desconvocatoria da folga de transporte de viaxeiros en Galicia tras o acordo entre patronal e sindicatos, pero rexeitou a posibilidade de que, por parte da administración autonómica, se incremente o investimento ao sector.

A preguntas dos xornalistas, nun acto na Coruña sobre a ampliación do complexo hospitalario universitario (Chuac), destacou o feito de que quedase desconvocada unha folga indefinida, inicialmente prevista a partir deste luns, "que non beneficiaba a ninguén".

Mentres, reivindicou o "esforzo sen precedentes" feito pola Xunta en materia de investimento en relación ao transporte público. "Un incremento do 1,2% anual ata o final da concesión", recalcou. A este investimento, remitiuse tamén ao ser cuestionada se por parte da Xunta prevese aumentar as partidas para o sector ante os novos compromisos en materia de retribucións por parte da patronal.

Varias persoas esperan autobuses desde unha das dársenas da nova estación de autobuses de Santiago de Compostela | Fonte: Álvaro Ballesteros