Os encoros de Cecebre e Baiona atópanse baixo especial vixilancia ao estar nun nivel inferior a 2022
A Xunta destaca que Galicia afronta o verán sen risco de seca e con "mellores perspectivas" que o ano pasado
Por E.P. | SANTIAGO DE COMPOSTELA | 07/07/2023 | Actualizada ás 14:47
A conselleira de Infraestruturas, Ethel Vázquez, informa que Galicia afronta o verán sen risco de seca ante o grao de reservas hídricas existentes. No entanto, a Xunta mantén baixo especial vixilancia os encoros de Cecebre, que abastece á área da Coruña, e Baiona ao atoparse en niveis inferiores aos de 2022.
En concreto, o encoro de Cecebre sitúase nun 73,2% da súa ocupación, o que supón un 18,4% menos que o ano pasado. Mentres, o de Baiona está ao 84%, case un punto menos que un ano antes.
En declaracións á prensa con motivo do Consello Reitor de Augas de Galicia, Ethel Vázquez indicou que "hai dous encoros que son os que máis preocupan en Galicia Costa", aínda que en ambos os sistemas hai plans alternativos para a subministración: en Cecebre, pola auga do lago das Encrobas; e o de Baiona está conectado ao encoro de Zamáns --que ocupa un volume de case do 95%--.
Para un maior control, o Goberno galego pasará a avaliar os indicadores e a facer seguimento cada 15 días. Ademais, apela aos municipios a que "adopten medidas preventivas", á vez que empraza aos cidadáns a realizar un consumo responsable da auga. No seu conxunto, os encoros da conca autonómica están ao 89%, o que supón catro puntos menos que o ano pasado por estas datas.
MELLORES PERSPECTIVAS PARA O VERÁN
Igualmente, a Xunta apunta ás "mellores perspectivas" en Galicia Costa coas que se afronta o verán fronte ao "complicado" período estival do ano pasado. En 2022 viviuse unha seca prolongada que non foi paliada ata un final de ano con valores de precipitacións uns 60% superiores á serie histórica. Aínda que "non hai preocupación", Ethel Vázquez chama a "estar atentos".
Neste 2023, as choivas foron en xuño moi superiores aos valores habituais, un 105% máis que a media entre 1981 e 2010. Ademais, prevese que xullo se peche con cifras normais ou superiores á media.
