O ministro de Industria via a Portugal a coñecer o proxecto de Altri e tentar obter fondos europeos
Goberno e compañía danse un prazo para realizar cambios cos que poder optar ao Perte de Descarbonización.
Por E.P. | SANTIAGO DE COMPOSTELA | 10/07/2023 | Actualizada ás 14:00
O ministro de Industria, Héctor Gómez, mantivo unha reunión a pasada semana en Lisboa con representantes da compañía de celulosa lusa Altri na que acordaron darse un prazo para axustar o proxecto de fábrica de fibras téxtiles en Palas de Rei aos criterios e as esixencias da UE para que poida obter financiamento.
Nun comunicado, o ministro destacou que Altri "presenta un proxecto extraordinario que encaixaría cos obxectivos da aposta cara á descarbonización". "Por iso vin ata aquí, para coñecer e acompañar, porque o apoio cara a este tipo de iniciativas debe contar con toda a nosa atención", asegurou.
O ministro coñeceu de primeira man o proxecto de investimento que esta empresa deseñou para Palas. Este encontro enmárcase dentro das reunións que responsables do Ministerio de Industria, Comercio e Turismo están a celebrar con compañías interesadas en acudir á futura convocatoria do Perte de Descarbonización que lanzará o Goberno.
"Este Perte, dotado con 3.100 millóns de euros, contribuirá a modernizar a nosa industria para afrontar con éxito a transición ecolóxica apostando polo fomento do uso de enerxías renovables, a protección do medio ambiente e o avance cara á economía circular. Queremos que España lidere a revolución verde industrial a nivel europeo e o Perte vai axudar a conseguilo", apunta.
"O Goberno español lidera esta aposta pola descarbonización industrial e acompañará na medida das súas posibilidades os investimentos que queiran apostar polo noso país", engadiu Gómez.
AXUDAS A BARCOS
O ministro de Agricultura, Pesca e Alimentación en funcións, LuIs Planas, aseverou este luns que desde o Goberno están "a ultimar a orde tecnicamente" ante as posibles axudas aos barcos que faenasen no caladoiro marroquí, que desde o día 17 de xullo ven afectados pola expiración do acordo pesqueiro co citado país.
Tras unha reunión co reitor da Universidade de Córdoba (UCO), Manuel Torralbo, Planas declarou que dita orde "será consultada ás comunidades autónomas e nos próximos días, antes do día 17, asinareina como ministro de Agricultura para que non haxa ningún período de interrupción en relación co apoio do sector pesqueiro".
