O PSdeG busca a mobilización dos indecisos apelando ás pensións, bolsas e dereitos laborais
Di que todo isto desaparecerá cun goberno de PP e Vox.
Por Europa Press / Redacción | SANTIAGO DE COMPOSTELA | 17/07/2023 | Actualizada ás 14:06
O secretario xeral do PSdeG, Valentín González Formoso, apelou este luns á mobilización dos cidadáns indecisos de cara á última semana de campaña e avisou de que o que está en xogo nestas eleccións é "ter un goberno sensible", que defenda as pensións, os dereitos laborais ou impulse as bolsas para os estudantes, fronte a que ameace todo isto.
Formoso pronunciouse deste xeito antes de realizar o traxecto en tren desde Santiago de Compostela ata A Coruña para reivindicar os abonos gratuítos aprobados polo Goberno de España para paliar os efectos da inflación. O dirixente socialista estivo acompañado pola cabeza de lista ao Senado pola provincia, Xosé Sánchez Bugallo, e do secretario provincial, Bernardo Fernández, entre outros.
Para Formoso, esta medida é un exemplo do "goberno sensible" que houbo no últimos cinco anos en España, que empregou os recursos públicos en paliar as dificultades que sufriu a poboación por culpa do aumento desmesurado dos prezos.
Nesta liña, puxo en valor as rebaixas dos combustibles e as axudas a pescadores, agricultores ou transportistas galegos no peor da pandemia e da crise de prezos, así como a subida das pensións, o salario mínimo ou a rebaixa das facturas da luz a través da excepción ibérica. Medidas que contrapuxo coas dunha Xunta que "non empregou nin un só céntimo" do recadado en axudar á cidadanía fronte á inflación.
ZAPATERO E SÁNCHEZ EN GALICIA
O secretario xeral do PSdeG referiuse a a visita a Galicia prevista para esta semana do expresidente do Goberno José Luís Rodríguez Zapatero --que estará este martes na Coruña-- e do presidente e candidato Pedro Sánchez --que prevé visitar Lugo o xoves--.
Formoso destacou que ambos dedican a súa vida a que "ninguén quede tirado" e xóganse " todo por tentar avanzar socialmente". Ademais, comparou a Sánchez cos "grandes deportistas" que, despois dun gran esforzo e de conseguir un gran éxito, "son deixados de lado pola opinión pública ao primeiro de vez".
