Co proceso penal a punto de concluír, as vítimas de Angrois volverán esixir responsabilidades 10 anos despois do accidente
Este domingo celebran unha asemblea no Pazo do Faramello e o luns renden homenaxe aos falecidos xunto á curva.
Por Europa Press / Redacción | SANTIAGO DE COMPOSTELA | 22/07/2023 | Actualizada ás 11:44
Vítimas do accidente do tren Alvia ocorrido no barrio compostelán de Angrois volverán marchar polas rúas de Santiago para esixir responsabilidades este luns 24, cando se cumpren 10 anos do sinistro ferroviario no que perderon a vida 80 persoas e 145 resultaron feridas.
O proceso penal conclúe estes días e mantén sentados no banco dos acusados ao maquinista, Francisco Garzón, e ao ex director de seguridade de Adif (a empresa pública encargada de velar pola seguridade nas vías), Andrés Cortabitarte.
A manifestación este luns estará marcada polo décimo aniversario e terá a vista posta tanto no ex alto cargo de Adif como no fiscal Mario Piñeiro, quen retirou a súa acusación contra este no último momento e agora só a mantén contra o maquinista.
Ás 11.30 horas, familiares de falecidos e feridos polo descarrilamento do Alvia na curva da Grandeira daranse cita ante a estación de tren santiaguesa. A protesta sairá ás 12.00 horas con dirección á Praza do Obradoiro, onde protagonizarán unha concentración ata as 13.15 horas, aproximadamente.
Pola tarde, ás 19.00 horas, as vítimas reuniranse xunto á curva, no barrio de Angrois, onde está previsto que o acto de homenaxe ao falecidos arranque ás 19.30 horas.
Con anterioridade, este domingo 23 ás 17.00 horas, os socios da plataforma de vítimas están convocados a unha asemblea no Pazo do Faramello, en Rois.
FINAL DO XUÍZO
Esta semana desenvolvéronse tres das cinco últimas sesións previstas do xuízo polo accidente, nas que expuxeron os seus informes finais o avogado do outro maquinista que viaxaba no Alvia e os representantes legais de Adif e Renfe.
O mércores 26 será a quenda dos das aseguradoras, Allianz e QBE, respectivamente. O xoves 27, reservado para as defensas, os dous acusados poderán facer uso do seu dereito á última palabra.
