O Goberno impulsa a mobilidade eléctrica en Galicia con máis de 8,5 millóns de euros en axudas

O delegado do Goberno en Galicia, Pedro Blanco, destacou os máis de 8,5 millóns de euros que o Executivo central concedeu en axudas para proxectos innovadores de mobilidade eléctrica na comunidade galega a través do programa Moves Singulares II. Segundo informa este venres a Delegación do Goberno, a segunda convocatoria desta iniciativa, xestionada polo Ministerio para a Transición Ecolóxica e o Reto Demográfico con fondos do Plan de Recuperación, Transformación e Resiliencia, resolveuse o pasado mes de xuño.

Nela, adxudicáronse en Galicia máis de 6,5 millóns de euros para 17 proxectos desenvolvidos por dez entidades e empresas diferentes. Estes traballos, lembra, únense ao seis proxectos adxudicados na primeira convocatoria, que deixou nesta comunidade autónoma outros dous millóns de euros en axudas.

Entre os proxectos seleccionados polo Instituto para a Diversificación e Aforro de Enerxía (IDAE), hai iniciativas como a instalación de puntos de recargo eléctrico con almacenamento, sistemas de recarga múltiple e de alta potencia, así como fomento de transporte eléctrico público.

Para Blanco, estas axudas xeran unha "oportunidade" para desenvolver programas de mobilidade "eficientes e sustentables", como o proxecto de desenvolvemento da rede intermodal, intelixente e sustentable de transporte eléctrico na zona da Ribeira Sacra. Este plan, que impulsa o Consorcio de Turismo Ribeira Sacra, puntualizou, recibe do Goberno 1.456.000 euros, un 40 % do total do custo.

O programa Moves Singulares, segundo explica, ten como obxectivo impulsar novos desenvolvementos tecnolóxicos no transporte público e persoal, "acelerar a súa madurez e, con iso, a súa comercialización posterior".