Feijóo ve un "avance" o apoio de Vox para nun goberno "constitucional"
Di que buscará "un acordo amplo e constitucional" para gobernar.
Por Europa Press / Redacción | MADRID | 06/08/2023 | Actualizada ás 17:36
O presidente do Partido Popular, Alberto Núñez Feijóo, cualificou de "avance no ámbito do constitucionalismo" a nova postura de Vox para apoiar a súa investidura sen esixir entrar no Goberno e manifestou que buscará "un acordo amplo e constitucional" para poder gobernar en solitario.
"A proposta que fago é dun goberno en solitario do Partido Popular. É necesario un partido para un goberno e non 24 partidos gobernando en España. Tantos partidos para gobernar, con ideoloxías distintas e intereses políticos contraditorios, é o contrario da gobernabilidade do noso país", asegurou Feijóo nun acto en Cambados, onde acudiu á 71ª edición da Festa do Albariño.
O líder PP explicou que a súa proposta de gobernabilidade baséase nun "acordo amplo e constitucional para seguir e proseguir nas reformas que necesita España". "Manter vixente a Constitución e avanzar como o fan os países de Europa, para crear o emprego, financiar as pensións e mellorar os servizos públicos. Niso consiste gobernar, o demais simplemente é resistir", afirmou.
TRES ESCENARIOS
Así, Feijóo recoñeceu que expón tres escenarios diferentes para España despois das eleccións do 23 de xullo. O primeiro deles, como detallou, é o bloqueo e unha nova repetición electoral, "como ocorreu co señor Pedro Sánchez no ano 2015 e no ano 2016".
O segundo, continuou, é unha investidura do actual presidente do Goberno en funcións e líder do PSOE, Pedro Sánchez, "a cambio de debilitar o Estado, de diminuír os intereses xerais e de crebar o principio de igualdade dos cidadáns".
O terceiro escenario é ese "acordo amplo e constitucional" no que Feijóo seguirá traballando durante as próximas semanas. "Estou convencido de que é necesario dar certezas neste momento de incerteza. É necesario apostar pola gobernabilidade e a centralidade do noso país, e é necesario mandar unha mensaxe de que é imprescindible un acordo amplo, constitucional, para facer as reformas que España necesita", indicou.
"Eu vou tentar ese acordo constitucional, ese acordo amplo, con humildade, cos intereses xerais como libro de cabeceira e con respecto ao resto de partidos políticos. Creo que é máis importante a humildade do que gaña, que a arrogancia do que perde", engadiu.
CRITICA AO PSOE
Doutra banda, Feijóo afeou que os socialistas rexeitasen a súa oferta para reunirse e referiuse en concreto á situación de Ceuta, onde o PSOE rompeu un preacordo para a gobernabilidade dos populares.
"O PSOE rompeu un preacordo para a gobernabilidade de Ceuta, unha cidade autónoma cuxa soberanía a reclama outro país onde está a veranear o candidato e o señor Sánchez. Certamente non é a mellor forma de empezar, nin é o mellor contexto para avanzar, pero este ese contexto co que se atopa España e co que nos atopamos a maioría dos españois", lamentou.
Por último, lembrou que o PSOE aínda non felicitou ao PP nin a el mesmo por gañar as eleccións. "Aínda o PSOE non aceptou a vitoria do PP nas urnas", sinalou.
FESTAS DE ALBARIÑO
Por outra banda, o presidente do PP, Alberto Núñez Feijóo, reivindicou o viño albariño como un símbolo de "serenidade", tal e como reza o 'apelido' do Capítulo Serenísimo do Albariño de Cambados, que celebrou este domingo a súa 71ª edición, e onde lamentou que o resultado das eleccións xerais fose "un cóctel axitado e non "unha copa de bo viño".
Na súa intervención, coa que deu comezo este acto de investidura de Damas e Cabaleiros do Albariño 2023, Feijóo tamén sinalou que é unha "mágoa" que non todas as investiduras "sexan como esta".
