Por Europa Press / Redacción | SANTIAGO DE COMPOSTELA | 04/09/2023 | Actualizada ás 15:31
A Unidade de Radiofármacos PET Galicia, que fornece os radiofármacos aos servizos de diagnoses de todos os hospitais do Servizo Galego de Saúde, superou con éxito un simulacro de incendio organizado este luns. O espazo situado no Hospital Clínico de Santiago que almacena este tipo de tecnoloxía empregada na realización de diagnósticos de enfermidades oncolóxicas, neurolóxicas e cardíacas para conseguir imaxes de alta precisión foi sometido a unha proba de seguridade para medir a súa resposta ante a declaración de incendios.
Segundo recolle un comunicado da Xunta, o simulacro contou coa presenza da xerente do Servizo Galego de Saúde, Estrella López-Pardo, así como a xerente de Galaria, Rocío Mosquera, e a xerente da área sanitaria santiaguesa, Eloína Núñez. O operativo estivo dirixido polo servizo de emerxencias do 112 e nel participaron a compañía de prevención de riscos laborais Quirón Prevención, así como a colaboración de todo o persoal da unidade.
Os resultados da proba foron "excelentes", segundo resalta a Xunta nun comunicado no que subliña a "rápida e eficiente" resposta de traballadores do centro, efectivos de bombeiros e Urxencias Sanitarias 061. Con esta proba, a unidade do Sergas renova a acreditación do certificado de cumprimento de normas que outorga a Axencia Española de Medicamentos e Produtos Sanitarios (AEMPS), máxima autoridade sanitaria en España nesta materia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.