A ELEN pide a inclusiuón do catalán, éuscaro e galego como linguas oficiais da UE

A Rede Europea para a Igualdade das Linguas (ELEN) pediu ao Consello da Unión Europa que inclúa o catalán, o éuscaro e o galego como linguas oficiais da UE. ELEN acolleu con satisfacción a proposta de España para a inclusión do catalán, o éuscaro e o galego como linguas oficiais de pleno dereito da UE e xunto cos seus membros Euskalgintzaren Kontseilua, Plataforma per a Llengua, Omnium Cultural, A Mesa pola Normalización Lingüística, Obra Cultural Balear e Acció Cultural País Valencià, pide aos Estados membros da UE que se reunirán este luns no Consello que apoien a proposta española.

Nun comunicado, ELEN destacou que a inclusión como linguas oficiais achega "numerosos beneficios prácticos, así como o prestixio que confire o status oficial". Ademais, segundo sinalou, "tamén daría á UE a oportunidade de estar á altura da súa política de apoiar a diversidade lingüística e permitir aos seus cidadáns utilizar a súa lingua coas institucións da UE".

"Se se inclúen estas linguas, o impacto será moi positivo e un gran paso cara ao recoñecemento e a normalización das nosas linguas, debido a que o status oficial a nivel europeo é clave para protexer os dereitos lingüísticos dos seus falantes", defendeu.

ELEN lembrou que hai "máis de 500 disposicións legais de todo tipo que esixen a presenza e o uso das linguas oficiais da UE, especialmente cando afecta a consumidores, e isto é moi importante porque ten un impacto directo e indirecto na vida cotiá das persoas". Por último, afirmou que a inclusión "será un fito importante, porque significaría que a UE recoñece a natureza plurilingüe de Europa e dos seus Estados membros".

Con todo, remarcou que este "non sería o fin da minorización lingüística, porque aínda queda un longo camiño por percorrer". Neste sentido, reafirmou o seu compromiso de "seguir traballando en todas as frontes para darlle ás nosas linguas o recoñecemento que merecen, co fin de garantir os dereitos lingüísticos dos nosos pobos".

Parlamento Europeo.