O alcalde de Pontevedra ve os seus primeiros cen días en solitario como "máis eficientes" sen pechar a porta ao PSOE
Miguel Anxo Fernández Lores sinalou que o reto máis inmediato que ten é "consolidar este concello como unha cidade cunha altísima calidade de vida, tanto para os que viven aquí como para a xente que a visita".
Por E.P. | SANTIAGO DE COMPOSTELA | 20/09/2023 | Actualizada ás 17:04
O alcalde de Pontevedra, Miguel Anxo Fernández Lores, fixo balance da xestión levada a cabo desde a súa investidura como rexedor da capital da provincia, agora en minoría do BNG, e destacou que foron "máis eficientes". En todo caso, agradeceu ao PSOE o apoio á investidura e tendeulles a man para un eventual goberno local.
O vindeiro domingo cumpriranse cen días "moi intensos e frenéticos" deste novo mandato, no que "mudou substancialmente a maneira de entender o goberno", algo do que fai unha "valoración positiva".
Segundo Lores, agora "todo se está levando doutro xeito" con "maior organización e coordinación" en comparación co últimos catro anos. "Estamos a gobernar como planeamos nun principio, sendo máis eficientes", resumiu.
O alcalde sinalou que o reto máis inmediato que ten o goberno local é "consolidar este concello como unha cidade cunha altísima calidade de vida, tanto para os que viven aquí como para a xente que a visita".
"DECISIÓNS ESTRATÉXICAS"
Para afrontar esta nova etapa, o alcalde explicou que se adoptaron distintas "decisións estratéxicas" como a mellora das relacións e colaboracións con outras administracións, que el mesmo asumise a portavocía do goberno á vez que a Alcaldía, simplificar a toma de decisións, dotar de máis contido á Xunta de Goberno "para darlle un novo impulso"; entre outras moitas cuestións.
Neste balance, Lores reprochou aos grupos municipais do Partido Popular e do Partido Socialista que sigan "mirando ao pasado", e insistindo nos plenos con mocións sobre a apertura ao tráfico de Raíña Vitoria, a retirada de lombos, ou a baixada do IBI. "Sempre coa mesma trécola", lamentou o alcalde.
Despois de volver agradecer aos concelleiros do PSOE o seu apoio na investidura, Lores dixo que respecta a súa decisión de non entrar no goberno local e manifestou que "se cambian de decisión, seguro que nos atoparán para facer unha coalición".
