Os sindicatos indican que "non hai máis incrementos" nos aumentos anunciados polo SERGAS para persoal
Tamén haberá aumentos salariais pactados a nivel estatal para todos os traballadores públicos mais os sindicatos evitan pronunciarse en profundidade até coñecer toda a proposta.
Por Europa Press / Redacción | SANTIAGO DE COMPOSTELA | 18/10/2023 | Actualizada ás 19:33
O Servizo Galego de Saúde (Sergas) reservará nos orzamentos da Xunta do próximo ano 2024 máis de 2.188 millóns de euros, un 8,62% máis que este 2023, na partida de persoal, ao incluír as melloras retributivas e de condicións laborais pactadas con todos os sindicatos da mesa sectorial o pasado mes de abril.
A Consellería de Sanidade presentou este mércores ás organizacións de traballadores as contas do ano que vén que afectan o persoal e a lei de acompañamento dos orzamentos, que inclúe un aumento de 870 prazas para compensar así medidas como a redución progresiva da xornada laboral. Así, en 2024 todo o persoal do Sergas traballará 10 días menos. Será o seguinte paso antes de que en 2025 a xornada semanal quede fixada en 35 horas.
Así mesmo, o texto aprobado en abril inclúe novas subidas retributivas a aplicar desde o 1 de xaneiro nas gardas e complementos como os de nocturnidade e quendas. Ademais, haberá complementos novos como para as quendas de tarde e deslizantes en Atención Primaria; as noites dos venres estarán consideradas prefestivas; e os días 24 e 31 de decembro pasan a ser de especial significación, entre outros aspectos.
En canto ao persoal, a Xunta destaca nun comunicado que tamén se incrementan as prazas en saúde mental, tal e como está previsto no plan 2020-2024, e que tamén soben en 88 as prazas de formación sanitaria especializada en Galicia.
Fontes sindicais consultadas por Europa Press destacan que os orzamentos recollen os acordos xa coñecidos, mais cuestionan que "non hai máis incrementos" que os mencionados, á parte dos aumentos salariais pactadas a nivel estatal para todos os traballadores públicos.
Na propia lei de medidas, o Sergas avanzou aos sindicatos o próximo lanzamento dunha oferta pública de emprego con prazas vinculadas a xubilacións que se produzan nos próximos anos. Sería unha maneira de "anticiparse" a estas baixas de persoal, comentan as organizacións, que con todo eluden pronunciarse moi en profundidade á espera de coñecer o detalle da proposta.
MELLORAS PARA PERSOAL DE BAIXA
Por outra banda, nesta reunión da mesa sectorial, presidida pola directora xeral de Recursos Humanos do Sergas, Ana Comesaña, a Administración confirmou que se manterá o pago de gardas, noites e festivos a traballadores que estean de baixa por continxencias comúns derivadas do embarazo, por enfermidades oncolóxicas graves e polos efectos e períodos de recuperación destes tratamentos.
O sistema sanitario permitirá que as persoas en incapacidade temporal polas situacións xa mencionadas cobren non só as melloras das retribucións fixas, senón tamén as gardas, noites e festivos calculadas en base ao percibido por estes conceptos o ano inmediatamente anterior.
O Sergas lembra nun comunicado que son dereitos que xa existían para o persoal en situación de maternidade, paternidade, risco durante o embarazo e risco durante a lactación, así como nos períodos de adaptación do posto por xestación e lactación. As fontes sindicais consultadas por Europa Press aludan esta medida, pero manteñen dúbidas sobre se as contías veranse afectadas os incrementos recolleitos no acordo de abril.
