En liberdade o detido en Sober na operación contra un grupo neonazi
Acolleuse ao seu dereito a non declarar.
Por Europa Press / Redacción | SANTIAGO DE COMPOSTELA | 19/10/2023 | Actualizada ás 14:54
O home arrestado o martes nunha aldea do municipio de Sober pola súa suposta vinculación coa organización criminal neonazi 'Combat 18' foi posto en liberdade este xoves coa obrigación de realizar comparecencias quincenais, segundo informaron a Europa Press fontes do Tribunal Superior de Xustiza de Galicia (TSXG).
O home de mediana idade, que responde as siglas G.C.B, acolleuse ao seu dereito a non declarar ante a autoridade xudicial e as dilixencias remítense agora ao xulgado que instrúe a causa, en Manresa (Barcelona).
O detido chegou ás dependencias xudiciais ao redor das 9,45 da mañá deste xoves custodiado por unha patrulla da Policía Nacional. Con xesto tranquilo, tatuaxes en ambas as mans, o brazo dereito en cabestrillo e sen cubrirse o rostro en ningún momento, o home procesado pola súa suposta vinculación coa organización neonazi e supremacista branca 'Combat 18' entrou no Xulgado de Instrución número 1 de Monforte de Lemos esposado e acompañado por dous axentes.
Vestido cunha chaqueta tipo 'bomber' de cor verde, un pantalón de camuflaxe caqui e unhas zapatillas brancas, o home arrestado o martes nunha vivenda de aluguer da aldea de Ferroños, en Sober, como parte dun operativo policial de alcance estatal que se saldou con 16 detidos, compareceu ante o xuíz durante máis de dúas horas.
