Por Europa Press / Redacción | SANTIAGO DE COMPOSTELA | 10/11/2023 | Actualizada ás 16:29
A conselleira de Infraestruturas, Ethel Vázquez, acusou ao comisionado para o corredor atlántico de actuar "como un muro que impide o diálogo". Sinalouno, segundo informa a consellería nun comunicado, coincidindo coa clausura do encontro 'Oportunidades e futuro do transporte ferroviario de mercadorías de Galicia', que organiza o cluster da función loxística de Galicia.
En concreto, a nota de prensa sinala que a Xunta "lamenta" que o comisionado para o corredor atlántico "cuestione a implicación do empresariado galego e actúe como un muro que impide o diálogo". O martes, o comisionado, José Sebastián Ruiz, asistiu no Porriño a unha xornada de redes de transporte e loxística organizada polo Eixo Atlántico do Noroeste e a Asociación Española do Transporte.
Ao día seguinte, a Confederación de Empresarios de Pontevedra (CEP) pediu a súa destitución por solicitar a empresarios galegos "que acheguen máis". Este venres, Ethel Vázquez, xunto co director xeral de Mobilidade, Ignacio Mestre, felicitou á CEP "por alzar a voz en defensa do traballo dos empresarios de Galicia fronte aos ataques do comisionado".
Resaltou que as industrias e os portos de Galicia están "envorcados" en crecer, incrementar a súa actividade e chegar a novos mercados. O corredor, engadiu, "espera unha planificación de investimentos por importe de 8.000 millóns", pero lamentou que "cando máis necesita Galicia unha rede de transporte ferroviaria competitiva, menor é o grao de compromiso por parte do Goberno de España". Así, censurou que o Executivo central "siga atrasando a presentación do plan director do corredor atlántico que se comprometeu a ter xa en 2019".
"AS PERSPECTIVAS NON SON BOAS"
Neste sentido, afirmou que as perspectivas "non son boas nin para as mercadorías nin para os viaxeiros", xa que a conexión ferroviaria entre Lugo e Ourense "renuncia a un trazado capaz de facer a viaxe máis rápida e competitiva e o tren Ferrol-A Coruña segue sen unha planificación decidida".
"Tampouco avanza a conexión de alta velocidade con Portugal e o Goberno parece renunciar á variante exterior de Ourense e á conexión da terminal de Bouzas", engadiu. Por último, trasladou a súa "inquietude" polas frecuencias suspendidas desde a pandemia "e non restablecidas a día de hoxe" e polos trens 'Avril', que acumulan atrasos "constantes e non hai data oficial concreta para a súa chegada a Galicia".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.