As estacións de tren de Cerceda-Meirama, Ordes e Uxes serán melloradas: novos accesos, pavimentación e sinais

Adif destinará un investimento de case oito millóns de euros para a mellora da accesibilidade, seguridade, interoperabilidade e habitabilidade das estacións de Cerceda-Meirama, Ordes e Uxes, todas elas integradas no Eixo Atlántico A Coruña-Vigo. En materia de accesibilidade, nas tres estacións actuarase sobre plataformas, pasos inferiores, ramplas e escaleiras, así como tamén se fará unha dotación de pavimentos antiescorregadizos, instalarase nova señalética e mobiliario e substituiranse varandas por pasamáns.

Á súa vez, Adif realizará reparacións por todas as estacións, pintaraas de maneira integral cun tratamento antigrafitis, mellorará a iluminación e habilitará o Sistema de Información ao Viaxeiro (SIV) con pantallas de información, teleindicadores en plataformas, cronometría, intercomunicadores e megafonía.

Na estación de Cerceda-Meirama, Adif instalará dous ascensores panorámicos, coas súas respectivas pasarelas de unión. Tamén construirá unha nova rampla no aparcadoiro para o acceso de vehículos e maquinaria de mantemento á plataforma, así como unha rampla de acceso peonil. Na de Ordes, adaptará as ramplas de acceso ao paso inferior, construirá un novo refuxio e unha rampla de acceso peonil no aparcadoiro.

Por outra banda, na estación de Uxes, ampliará a superficie pavimentada da plataforma, así como a lonxitude do desembarque das ramplas de acceso ao paso inferior. Tamén pavimentará os aparcadoiros, demolerá as ramplas de acceso á plataforma uno desde o aparcadoiro e construirá ramplas de acceso peonil e de vehículos de mantemento. Todas estas actuacións atópanse dentro do marco de aplicación do Plan de Recuperación, Transformación e Resiliencia, correspondente ao instrumento Next Generation EU.

Imaxe dun tren en Galicia | Fonte: ADIF - Arquivo