O Bono Coidado no Fogar para persoas con dependencia entregarase de forma automática a 20.000 familias galegas
Fabiola García lembrou que as axudas son para persoas con dependencia recoñecida nas súas casas, "non están dirixidas unicamente ás persoas maiores, senón a todas as persoas con dependencia independentemente da súa idade, grao de dependencia ou situación económica".
Por Europa Press / Redacción | SANTIAGO DE COMPOSTELA | 10/12/2023 | Actualizada ás 17:07
A conselleira de Política Social e Xuventude, Fabiola García, mantivo este domingo un encontro con dous beneficiarios do 'Bono Coidado no Fogar', anunciado no Debate sobre o Estado da Autonomía en outubro, para insistir en que a axuda de 5.000 euros anuais para persoas con dependencia realizarase sen ningún trámite e de forma automática.
Fabiola García lembrou que as axudas son para persoas con dependencia recoñecida nas súas casas, "non están dirixidas unicamente ás persoas maiores, senón a todas as persoas con dependencia independentemente da súa idade, grao de dependencia ou situación económica".
Segundo a conselleira, esta axuda destinarase a 20.000 familias galegas e implicará máis de 100 millóns de euros. Así mesmo, comunicou que as persoas que non teñen recoñecida a dependencia ou que perciben outra axuda e queren cambiarse, poderán facelo nos servizos sociais comunitarios.
Ademais, Fabiola García destacou que a Xunta "apoia" ás persoas con dependencia a realizar o seu proxecto de vida "alí onde prefiren e á vez que están ben atendidos" e que para facelo posible reforzan cada ano o investimento no Servizo de Axuda no Fogar e melloran o servizo de teleasistencia.
