Rueda di que a mellor receita contra a inflacción é ter "as contas en vigor"

O presidente galego, Alfonso Rueda, non plantea ningunha medida específica para loitar contra a inflación tras coñecerse este xoves que subiu en Galicia no mes de novembro ata o 3,3%. Preguntado sobre se planea algunha medida específica máis coa que combater a inflación, replicou que "a maior" é ter unhas contas en vigor como, recalcou, terá Galicia no principio do ano. Estas contas, agregou, permitirán a Galicia adoptar decisións de carácter social, de apoio ás familias e de rebaixa de impostos que contribúen, en todos os casos, a "combater" a inflación.

ORZAMENTOS

Ademais, manifestou que, a pesar de non coñecer as entregas a conta, a Xunta articulou un proxecto de orzamentos para 2024 bastante "acertado" e non avanzou cambios, preguntado sobre a posible necesidade de axustes ante as cifras facilitadas polo Goberno no último Consello de Política Fiscal e Financeira (CPFF).

En todo caso, pediu "máis concreción" en termos xerais e, de forma significativa, no que respecta ao futuro de determinadas reducións fiscais, como a do IVE, que impactan nas arcas autonómicas.

A preguntas dos medios, Rueda volveu a queixarse de "os meses de atraso" e, en canto ás cifras achegadas,  aínda póndoas "con moitísimas reservas", defendeu que a Xunta "acertou" coas estimacións coas que se elaboraron as contas, nas que se buscou ser "o máis obxectivos posible". "E teño que dicir que creo que acertamos, acertamos moito", aseverou.

Iso si, demandou unha maior "concreción" sobre o futuro de reducións fiscais como a do IVE en determinados alimentos. "Cremos que hai que mantelas, e mesmo aumentalas ao peixe e á carne", asegurou, pero engadiu que, en todo caso, é preciso ter claro se van seguir ou non a partir do 1 de xaneiro, posto que impactan na recadación das comunidades.

"O ano pasado foron 322 millóns os que deixamos de ingresar por esas reducións que, insisto, pedimos que se manteñan. Pero lamentamos a incerteza, que é o que eleva todas estas inseguridades, engadido ás negociacións bilaterais, evidentes e intolerables" que, concluíu, son o seu principal motivo de "preocupación".

AXUDAS COMO A BONIFICACIÓN DO TRANSPORTE

Á marxe das reducións fiscais, Rueda tamén advertiu que sería conveniente ter información clara sobre a disposición do Goberno para continuar con bonificacións como a do transporte público, entre outras axudas. Pero lamentou que as conferencias sectoriais "non se convocan, ou son telemáticas ou por escrito", algo que espera que "mellore" en canto o Executivo estatal "se asente".