Galicia presenta 117 praias como candidatas a optar polas bandeiras azuis en 2024
A distribución é: 40 pertencentes á provincia da Coruña, 16 á de Lugo e 61 de Pontevedra.
Por Europa Press / Redacción | SANTIAGO DE COMPOSTELA | 08/02/2024 | Actualizada ás 16:49
Galicia presentou este ano un total de 117 praias (40 pertencentes á provincia da Coruña, 16 á de Lugo e 61 de Pontevedra) como candidatas a optar á Bandeira Azul 2024. Trátase da mesma cifra do ano pasado, tal e como avanzou a directora xeral de Patrimonio Natural, Belén do Campo, tras participar en Madrid na reunión do xurado nacional encargado de conceder uns distintivos cos que a Asociación de educación ambiental e do consumidor (Adeac) recoñece anualmente a areais de todo o mundo seleccionados en base a unha serie de criterios de sustentabilidade, accesibilidade e servizos, entre outros.
Tal e como explicou, con 117 praias propostas, Galicia é a terceira autonomía en formalizar máis candidaturas este ano, só por detrás da Comunidade Valenciana e Andalucía, que presentaron 154 e 152 praias, respectivamente. Ata mediados do mes de maio non se coñecerá a lista definitiva de areais galardoados, aínda que Belén do Campo mostrou a súa confianza en que Galicia volva estar en 2024 entre as comunidades á fronte da clasificación das bandeiras azuis, que son "un reclamo turístico innegable", xa que permiten facer das costas "un destino atractivo á vez que dinamizan a economía e o emprego en todos os sectores vinculados ao turismo".
As praias deberán acreditar unha calidade das augas "excelente", unhas boas condicións de seguridade, servizos e accesibilidade, así como unha adecuada xestión ambiental. Remarcan ademais que Galicia ocupa desde hai anos uno dos primeiros postos de clasificación a nivel nacional en canto a número de distintivos azuis recibidos, con 174 na edición de 2023 entre praias, rutas, portos deportivos e centros de visitantes. A este respecto, apuntan que tras darse a coñecer a relación de carreiros azuis de 2024, a comunidade consolídase como líder absoluta nesta categoría, con 49 rutas galardoadas e superando en 14 os itinerarios que foron recoñecidos en 2023.
