Por Europa Press / Redacción | SANTIAGO DE COMPOSTELA | 09/02/2024 | Actualizada ás 14:50
O Recinto Feiral Internacional de Galicia (Silleda) acolle esta fin de semana as probas selectivas para o acceso ao Servizo Galego de Saúde (Sergas) en distintas categorías ás que se presentan un total de 2.138 opositores. Entre as categorías a exame están Enfermaría Familiar e Comunitaria; Fisioterapeuta; Técnico Superior de sistemas e tecnoloxías da información e Técnico/a superior en Hixiene Bucodental.
Na xornada do sábado, o Sergas ofrece un total de 134 prazas distribuídas en catro categorías profesionais. En concreto, 61 prazas de enfermeiro especialista en enfermaría de familia e comunitaria; 70 de fisioterapueta; un de técnico superior de sistemas e tecnoloxías da información; e dous de técnico superior en hixiene bucodental.
Na páxina web do Sergas aparece recollida a información das distintas portas de acceso ao recinto e a relación de aspirantes comprendidos en cada unha delas. Durante todo o mes de febreiro, o Sergas oferta un total de 913 prazas distribuídas en 10 categorías. Así, ás 134 prazas deste sábado engádense as 779 ofertadas durante a pasada fin de semana, na que participaron máis de 13.500 opositores. O próximo 16 de marzo o Sergas continuará coa realización das probas selectivas para a cobertura de prazas en 37 categorías de persoal estatutario licenciado sanitario.
Durante a quenda de mañá, desenvolveranse os exames de Facultativo especialista en: alergoloxía; anatomía patolóxica; anxioloxía e cirurxía vascular; cirurxía cardiovascular; cirurxía oral e maxilofacial; cirurxía pediátrica; cirurxía plástica, estética e reparadora; dermatoloxía médico-cirúrxica e venereoloxía; endocrinoloxía e nutrición; medicina física e rehabilitación; medicina intensiva; microbioloxía e parasitoloxía; nefroloxía, neurociruxía, neuroloxía, oftalmoloxía, oncoloxía médica, otorrinolaringoloxía; pneumoloxía; psiquiatría; uroloxía; xeriatría; médico de admisión e documentación clínica; e médico asistencial do 061.
Xa pola tarde será a quenda de anestesioloxía e reanimación; aparello dixestivo; cardioloxía; cirurxía torácica; cirurxía xeral e aparello dixestivo; hematoloxía e hemoterapia; medicina interna, medicina preventiva e saúde pública; neuroloxía, pediatría e as súas áreas específicas; psicoloxía clínica, radiodiagnóstico, reumatoloxía; e médico coordinador do 061.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.