Abertas dilixencias para aclarar unha denuncia sobre emisións tóxicas de cal vivo nas Somozas

O Xulgado de Instrución número 2 de Ferrol acordou incoar dilixencias previas para determinar se existe un delito contra a ordenación do territorio por mor dunha denuncia formulada por Ecoloxistas en Acción e a Asociación Galega de Consumidores e Usuarios (Acouga) en relación a emisións de cal vivo no procesamiento dos residuos industriais na planta das Somozas.

As organizacións formularon a denuncia en relación ao Centro de Tratamento de Residuos Industriais de Galicia (Ctrig) das Somozas, que está xestionado por Sogarisa, antiga entidade pública na que, segundo lembran nun comunicado, "agora participa a Xunta nun 10%, xunto coa UTE PMA-Conteco".

Na súa denuncia, as entidades alertaban de que o pasado 24 de xaneiro a planta desprendeu vapores con presenza de CAO (óxido de calcio ou cal vivo), que se usa como reactivo para estabilizar os residuos líquidos perigosos que se tratan.

Segundo consta no seu escrito, esas emisións "xa reiteradas" constitúen "unha aberta vulneración da normativa de Prevención e Control Integrado da Contaminación (IPPC), xa que estes procesos con cal deben realizarse "nunha instalación estanca con aspiración e supresión de partículas". O obxectivo, remarcan, é impedir, precisamente, a emanación de elementos nocivos para a saúde humana e animal.

ENCOMENDA AO SEPRONA

Con todo, neste episodio que motivou a denuncia, os promotores da mesma indican que os residuos se depositaron "nuns prados próximos propiedade dun gandeiro das Somozas que os usa para alimentar o seu gando".

Así, no auto con data de 15 de febreiro de 2024, encoméndase ao Servizo de Protección da Natureza (Seprona) da Garda Civil que procedan a practicar xestións encamiñadas a esclarecer os feitos investigados, interesando que informen o xulgado sobre os feitos denunciados.

A XUNTA DEFENDE QUE SE COMPROBOU O "CORRECTO" FUNCIONAMENTO

A Xunta defendeu que, a principios deste ano, os inspectores do Servizo de Intervención Ambiental da Vicepresidencia Segunda e Consellería de Medio Ambiente comprobaron que a planta de procesamiento de residuos industriais das Somozas funciona de modo "correcto" e que xa non se emprega a antiga planta de estabilización para a inertización de residuos con cal. Así o trasladaron fontes do departamento que dirixe Ángeles Vázquez, a consulta de Europa Press, despois de transcender que un xulgado de Ferrol abriu dilixencias para aclarar a denuncia. Respecto diso, a Xunta trasladou que non recibiu ata o momento requirimento de información algún por parte da Fiscalía en relación a este asunto, polo que, engade, non ten "constancia oficial" da apertura de dilixencias neste sentido.

INERTIZACIÓN DE RESIDUOS

En todo caso, explicou que a inertización dos residuos nas instalacións dos residuos nas instalacións de Sogarisa realízase mediante unp roceso que xera "unha reacción exotérmica que causa este tipo de nubes, formadas por vapor de auga e po".

No entanto, agregou que non detectou unha "afección relevante" destes episodios. Ademais, apuntou que as instalacións das somozas contan cunha nova planta de estabilización --en funcionamento completo desde abril de 2023-- que traballa en pechado mediante un proceso "automatizado e vixiado" no que todo o equipamento dispón de sistemas que evitan a emisión de po á atmosfera. Engadiu que, a principios deste ano, os inspectores do departamento autonómico comprobaron que o funcionamento era o correcto.